Ară anei ti čar Dak Lak mâo êbeh 137.000 čô đảng viên, 1045 êpul bruă Đảng nah gŭ leh anăn 6.000 anôk bruă Đảng. Leh mkŏ dăp anôk bruă knŭk kna, čar Dak Lak mkŏ mjing leh 102 anôk bruă Đảng ƀuôn hgŭm mrâo, klei čih pioh đảng viên dưi bi mrâo hlăm anôk kriê dlăng mbĭt. Hluê ngă ai tiê jing bi klă gru hmô mkŏ mjing, mđĭ hnơ̆ng jăk bruă Đảng nah gŭ, čar ba mdah leh lu klei mtô čiăng bi kjăp hdră bhiăn ngă bruă leh anăn đĭ kyar đảng viên ti krĭng taih bưi. Y-Nhuân Ƀuôn Yă, k’iăng khua êpul mkŏ mjing Bruă Đảng čar Dak Lak brei thâo:

          Tal 1, lŏ dơ̆ng mđĭ klei hâo hưn čiăng ngă djŏ hdră bhiăn Đảng, tal 2, mtô bhĭ klĭ hĭn ti gưl nah gŭ čiăng mđĭ hnơ̆ng klei ngă bruă, tal 3, mtrŭt mđĭ hưn mdah phung ƀuôn sang êdah êdi, mđĭ kyar đảng viên krĭng taih kbưi, leh anăn tal 4, grăp thŭn srăng mâo klei ksiêm dlăng kơ grăp gưl bruă Đảng nah gŭ, kơ grăp anôk bruă Đảng kơ bruă hluê ngă hdră bhiăn Đảng.”

Mta phŭn anei ăt găl guôp hŏng hdră tă hlăm klei hưn mdah ksiêm wĭt jing bi mbŏ klei čuăn klă klơ̆ng kơ klei kƀĭn grăp tuôr mơ̆ng anôk bruă Đảng nha gŭ, mgaih msir klei ngă khă bi mâo. Ti Dak Lak, hlăm dŭm gưl ksiêm dlăng thŭn 2024, 85% êpul bruă Đảng nah gŭ dưi bi klă jing bi leh jăk bruă klam, ƀiădah ăt adôk êbeh 30 anôk bruă Đảng bi kƀĭn ka bi knar, mta phŭn ka êlam. Ti nah gŭ, bruă kriê dlăng đảng viên ăt jing bruă dleh. Nguyễn Ngọc Thịnh – khua bruă Đảng êpul 6 Tân Lợi, ƀuôn hgŭm Ƀuôn Ama Thuôt brei thâo, leh bi mŭt mbĭt, lu ƀuôn hgŭm mâo ênoh đảng viên lu, hlăm anăn năng mđing jing klei đảng viên mda asei nao mă bruă kbưi đĭ lu, ngă kơ klei bi kƀĭn anôk bruă tuôm hŏng lu klei dleh dlan.

 Anôk bruă hmei mâo 30% đảng viên nao mă bruă kbưi, klei kriê dlăng dleh êdi. Kâo akâo čiăng ksiêm duah êlam hĭn kơ klei kriê dlăng đảng viên nah gŭ, amâo mâo bi myuôm ênoh ƀiădah dlăng kơ hnơ̆ng jăk.”

          Klă sĭt anei ăt msĕ hŏng mta phŭn hra mơar lač čiăng ksiêm duah bi mbŏ klei čuăn kơ kriê dlăng đảng viên nao anôk mkăn, đảng viên mă bruă êngao knŭk kna. Hluê si êpul mkŏ mjing bruă Đảng čar Dak Lak, Dak Lak ti lu ƀuôn hgŭm taih kbưi, ênoh đảng viên amâo tuôm ƀuh nao kƀĭn mơ̆ng 15 – 20%. Đa đa anôk bruă knŏng adôk mă ƀiă đảng viên. Ti anăp boh sĭt anăn, čar dôk lông yua phần mềm kriê dlăng đảng viên nao anôk mkăn, jao kơ gưl bruă Đảng nah gŭ bi mrâo klei čih hưn leh anăn rơ̆ng klei bi kƀĭn kơ đảng viên nao mă bruă kbưi.

Mơ̆ng klei ksiêm duah, hră ksiêm wĭt mơ̆ng gưl dlông bi klă klei ktuê dlăng dưi mđĭ hĭn ƀiădah adôk mâo klei êdu kƀah hlăm klei hmao ƀuh, ƀuah mkra leh anăn ktuê dlang jêñ jêñ. Ti Dak Lak, wưng thŭn 2021 – 2025, čar ngă leh 1.200 klei ksiêm dlăng, ktuê dlăng, hmao ƀuh leh anăn ƀuah mkra êbeh 300 boh klei ngă soh, hrŏ giăm 30% mkă hŏng wưng anei thŭn dih. 100% knuă druh ksiêm dlang dưi hriăm klei bi mlih mrô, ƀrư̆ ƀrư̆ mkŏ mjing gru hmô ksiêm dlăng hlăm klei čih hưn, đru hmao ƀuh hnưm brư soh, gang mkhư̆ mơ̆ng phŭn. Nai prĭn Phạm Thị Xuân Nga, k’iang khua anôk bruă kreh knhâo yang ƀuôn krĭng kwar krah – Lăn Dap Kngư lač, čiăng hluê ngă djŏ hŏng hră hưn mdâh Klei kƀĭn kluôm tal 14, čiăng lŏ dơ̆ng bi kluôm hdră ktuê dlăng êngiê leh anăn klă mngač hĭn:

Ksiêm dlăng klei bi kƀĭn anôk bruă, hmei ƀuh čiăng mđĭ hĭn klei klă mngač, klei êngiê hlăm ktuê dlăng, mgaih msir klei duah mdưm hlăm klei bi klă đảng viên, mbĭt anăn mtrŭt mđĭ dưn yua kdrăp mrâo mrang hlăm kriê dlăng leh anăn bi kƀĭn boh tŭ hluê ngă hdră bhiăn Đảng.”

Êngao kơ ksiêm dlăng hlăm lam, hră ăt bi klă bruă klam ktuê dlăng yang ƀuôn mơ̆ng mặt trận čar kar Việt Nam leh anăn dŭm êpul bruă kđi čar yang ƀuôn. Ti Dak Lak, grăp thŭn mặt trận bi mguôp ngă dŭm êtuh klei ksiêm dlăng kơ bruă hluê ngă hdră bhiăn êngiê ti nah gŭ, bruă knuă druh, mgaih msir klei kčŭt hưn, hưn mdah bruă knŭk kna, knuih hdĭp phung mă bruă knŭk kna leh anăn klei bi hmô mơ̆ng pô ba anăp. Thŭn 2024, bruă mặt trận ngă leh êbeh 250 klei ksiêm dlăng, hưn mdah 420 mta phŭn mâo anôk bruă mâo klei dưi mđing hmư̆, hlăk mblang. Hluê si đảng viên Lê Hữu Chỉnh ti ƀuôn hgŭm Ƀuôn Ama Thuôt, mặt trận ksiêm dlăng jing djŏ hĭn.

“Ksiêm dlăng mơ̆ng mặt trận jing ktang êdi, kyua mặt trân jing mơ̆ng jih jing mnuih ƀuôn sang. Mâo knhuah yuôm bhăn čiăng ksiêm yap jing mặt trận, kyua mặt trận amâo mâo klei dưi hlăm bruă knŭk kna. Kâo lač sơnăn jing jăk êdi leh anăn drei dưi bi lar bruă mặt trận, klei anăn ăt djŏ ai Đảng, klei mnuih ƀuôn sang čiăng”.

Mơ̆ng boh sĭt ti Dak Lak brei ƀuh, dŭm mta phŭn lač hlăm Klei hưn mdah ksiêm wĭt 15 thŭn ngă hdră bhiăn Đảng mâo dŭm alŭ wăl bi klă hŏng bruă klă sĭt. Ƀiădah čiăng ko dŭm klei čuăn nao hlăm klei hdĭp, čiăng lŏ dơ̆ng bi kluôm hdră ksiêm dlăng, ktuê dlăng mơ̆ng anôk bruă Đảng nah gŭ truh kơ gưl čar, mbĭt anăn bi klă bruă klam ktuê dlăng yang ƀuô mơ̆ng mnuih ƀuôn sang leh anăn mặt trân hlăm hdră bhiăn mkra mlih. Êjai ksiêm dlăng leh anăn ksiêm dlăng jing klei mưng ƀuah mkra, hdră bhiăn đảng klă sĭt jing hnơ̆ng djŏ ngă bruă hlăm klei hdĭp kđi čar mơ̆ng Đảng.