Dŭm mnơ̆ng yuôm bhăn ñu pioh ba klei jăk siam, jing pui mtrang êlan, guh mngač ênoh yuôm djuê ana leh anăn wưng ênuk. Bi hdơr 133 thŭn Hruê kkiêng Khua gĭt gai Hồ Chí Minh (19/5/1890 - 19/5/2023).

Ti anăp klei luč ala čar, rai pưk sang, ktuê dlăng klei ktư juă măk ƀai mơ̆ng phung plă mmiă mtao mtŭng, klei knap mnai mơ̆ng mnuih ƀuôn sang mă bruă, êkei êdam khăp kơ ala čar Nguyễn Tất Thành bi klă klei mĭn nao kơ ala tač êngao leh anăn “srăng wĭt đru kơ mnuih ƀuôn sang pô” hlăm klei krŭ kdơ̆ng sua wĭt klei êngiê, klei yâo mơak kơ mnuih ƀuôn sang. Thŭn 1941, leh 30 thŭn nao ti ala tač êngao duah êlan dŏng mtlaih ala čar, Awa Hồ lŏ wĭt kơ ƀuôn sang khăp hơiêng, klă anăp gĭt gai bruă krŭ kdơ̆ng, hluê ngă bruă klam hƀuê ênuk mơ̆ng Đảng, sua wĭt klei êngiê kơ ala čar, klei êngiê kơ mnuih ƀuôn sang. Leh truh mmông găl, Ñu gĭt gai leh klei krŭ kdơ̆ng mlan 8 tŭ jing, bi mlih klei jing mnuih ƀuôn sang Việt Nam, djuê ana Việt Nam. Ñu lŏ jing klei bi hmô kơ klei êđăp ênang, klei bi hgŭm leh anăn bi mguôp plah wah dŭm djuê ana. K’iăng khua nai prŏng, nai prĭn Bùi Đình Phong, Anôk bruă ksiêm hriăm bruă kđi čar ala čar Hồ Chí Minh hlăk mblang:

 “Klei ngă bruă Hồ Chí Minh, hdră tă Hồ Chí Minh, knhuah hdĭp Hồ Chí Minh, klei mĭn Hồ Chí Minh brei ƀuh: Hồ Chí Minh yua dhar kreh msĕ si êa ƀlĭt, aruăt klei bi mkŏ dŭm djuê ana, lăm lui leh dŭm êwang kpleh. Wăt kơ mnuih Prăng, mnuih Mi hriê plah mmiă, Ñu ăt lač: Hriê plah mmiă ăt srăng čăm, ƀiădah êrah anei, êrah duh ăt jing êrah, mnuih anei, mnuih dih ăt jing mnuih. Ñu hơiêng kơ klei hdĭp mnuih Việt Nam ăt msĕ hŏng klei hdĭp mnuih Prăng, Mi”.

Dŭm klei mĭn mơ̆ng ñu kơ mta phŭn, klei jing, mta kñăm, boh kdrŭt… leh anăn dŭm boh klei mâo knhuah hdră bhiăn leh anăn mkŏ mjing yang ƀuôn ngă phŭn, kjăp hŏng klei êngiê djuê ana leh anăn yang ƀuôn ngă phŭn jing aruăt mrai hrah ktrâo êlan, klei găl hluê ngă tŭ jing bruă klam mkŏ mjing leh anăn răng mgang ala čar. Nai prĭn Lê Trung Kiên, Anôk bruă Hồ Chí Minh leh anăn phung khua gĭt gai Đảng mñă klă:

 “Mnơ̆ng kriê pioh mâo kjăp mơ̆ng khua gĭt gai Hồ Chí Minh hŏng djuê ana leh anăn ênuk gưl, êdah hĭn kơ ala čar jing bruă hrŏng ruah, tui duah, mkŏ mjing êklei êngiê djuê ana naoi mbĭt hŏng yang ƀuôn ngă phŭn ti Việt Nam. Boh nik hlăm klei mlih mrâo ala čar, lŏ wĭt hŏng mnơ̆ng kriê pioh Hồ Chí Minh čiăng dưi ƀuh dŭm klei mĭn, klei hlăk mblang mơ̆ng ñu kơ hdră êlan mrâo đru bi kluôm klei hlăk mblang kơ hdră êlan mlih mrâo mơ̆ng Đảng Cộng sản Việt Nam ară anei”.

Bruă krŭ kdơ̆ng mơ̆ng khua gĭt gai Hồ Chí Minh mâo klei kčưm leh anăn bi ruê̆ mđĭng truh kơ klei bi êngiê anak mnuih, kriê dlăng klei yâo mơak mơ̆ng anak mnuih. Klei kriê pioh Hồ Chí Minh kơ bruă mkŏ mjing leh anăn mđĭ kyar bruă duh mkra, amâo mâo mdei mđĭ hnơ̆ng klei hdĭp leh anăn ai tiê kơ mnuih ƀuôn sang, êlâo hĭn jing mnuih ƀuôn sang mă bruă. Ñu ăt lui kơ ênuk êdei anăp ngăn dưn yuôm bhăn kơ bruă mkŏ mjing Đảng leh anăn bruă kđi čar čiăng dưn yua leh anăn mđĭ kyar hŏng boh sĭt djuê ana leh anăn ênuk gưl. Hluê si Nai prŏng nai prĭn Mạch Quang Thắng, hlăm wưng ară anei, čiăng hyuă kjăp klei mjĕ giăm kđeh êrah plah wah Đảng leh anăn mnuih ƀuôn sang:

              “Đảng kbiă mơ̆ng mnuih ƀuôn sang, Đảng jing anak mnuih ƀuôn sang, Đảng mâo bruă klam mpŭ hŏng amĭ ama pô jing mnuih ƀuôn sang. Khua gĭt gai Hồ Chí Minh lač klă hĭn “Đảng jing phung dĭng buăl, pô đru kơ mnuih ƀuôn sang”. Klei anei hlăm wưng cách mạng ară anei ăt mñă ktang čiăng hyuăt kjăp klei mjĕ giăm hluê si klei mĭn Hồ Chí Minh jing klei mjĕ giăm kđeh êrah plah wah Đảng leh anăn mnuih ƀuôn sang”.

Ksiêm duah, dưn yua, mđĭ kyar hŏng klei bruă ngăn dưn Hồ Chí Minh čiăng thâo klă kluôm êlam hĭn kơ boh tŭ dưn ngăn dưn mơ̆ng nu hŏng djuê ana leh anăn mnuih ƀuôn sang, mbĭt anăn ngă kơ boh tŭ anăn ƀrư̆ hruê ƀrư̆ kjăp, mngač mbĭt hŏng djuê ana leh anăn anak mnuih. Kjăp hŏng ngăn dưn Hồ Chí Minh, Việt Nam srăng dưi ngă tŭ jing klei hmăng hmưi mơ̆ng ñu kơ bruă “Mkŏ mjing sa ala čar Việt Nam êđăp ênang, hluê hlir, êngiê, ƀuôn sang ngă phŭn, mdrŏng sah leh anăn đru mguôp năng hŏng bruă krŭ kdơ̆ng tar rŏng lăn.”