VOV4.Êđê - Ti anăp klei mâo dleh dưi ksiêm dlăng mơ̆ng yan adiê, Anôk bruă pui kmlă Dak Lak pral mâo hdră mdrơ̆ng hŏng klei yan adiê ngă. Anôk bruă mkŏ mjing leh 2 êpul ba anăp kăp mdrơ̆ng lehanăn tui duah mnuih mâo klei truh hŏng êbeh 40 čô. Mbĭt hŏng bruă klam msir mghaih klei truh tăm mâo ti Dak Lak, êpul anei mprăp nao đru kơ dŭm čar mkăn tơdah mâo klei čiăng mjêč.

Dŭm anôk bruă pui kmlă hlăm čar kreh ksiêm dlăng nanao dŭm hdră pui kmlă ti alŭ wăl, kah mbha bruă klam klă klơ̆ng kơ grăp êpul, mnuih tŭ đua klam hŏng grăp êlan pui kmlă, anôk mđĭ mtrŭn pui kmlă, rơ̆ng klei êđăp ênang ti dŭm anôk yuôm bhăn… Mbĭt anăn hluê ngă hdră bi mngač tač wăl djiêu gah anôk bruă pui kmlă, mđĭ klei bi hgŭm hŏng dŭm alŭ wăl bi jơr hdră hâo hưn, mtô mblang čiăng kơ mnuih ƀuôn sang rơ̆ng klei êđăp ênang pui kmlă. Êdah êdi msĕ ti kdriêk Êa Hleo, anôk kreh hmăi mơ̆ng gưl hjan prŏng, Phạm Thế Nghi, Anôk bruă pui kmlă Êa Hleo brei thâo: Anôk bruă pui kmlă nao ksiêm dlăng, mkra leh êlan pui kmlă, hưn brei răng kơ êlan pui kmlă ti tluôn công tơ čiăng msir mghaih dŭm anôk amâo mâo êđăp ênang. Anôk bruă pui kmlă ăt mđĭ anôk mđĭ mtrŭn pui kmlă čiăng mkăp pui jăk hĭn. Hmei ăt mbha pŏk hră điêt mtô mblang kơ mnuih ƀuôn sang ba yua pui kmlă mkiêt mkriêm, êđăp ênang lehanăn tŭ dưn./.

VOV TâyNguyên/Pô mblang: H’Nêč Êñuôl