VOV4.Êđê -  Hŏng mta kñăm mđĭ hnơ̆ng tŭ hdră mă bruă, wưng êgao, Anôk bruă Pui kmlă Dak Nông mâo leh lu hdră mkra mlih hlăm klei ngă hră m’ar, mđĭ klei kpă mngač hlăm hdră msir mghaih bruă knuă djŏ tuôm kơ pui kmlă. Mbĭt anăn, bi lu jơr hlăm bruă tŭ drông mnuih hriê mă bruă djŏ tuôm kơ pui kmlă, msĕ si nao ti adŭ bruă, hluê êlan online, đĭng blŭ 19001909, hluê website...

Tơdah mâo klei čiăng êmuh, mnuih ƀuôn sang iêu kơ mrô đĭng blŭ srăng dưi msir mghaih pral, tŭ dưn. Bi ti Mblah hâo hưn bruă knuă ala čar, mơ̆ng akŏ thŭn truh ară anei, PC Dak Nông msir mghaih leh giăm 20.000 pŏk hră hưn lač kơ bruă pui kmlă ti gưl 4. Hluê anăn, wưng tŭ mă, msir mghaih klei mkăp mrâo pui kmlă dưi hrŏ 2 hruê mkă hŏng êlâo. Ară anei, anôk bruă mkăp leh 12 hdră djŏ tuôm kơ bruă pui kmlă hluê êlan online ti Mblah hâo hưn bruă knuă ala čar msĕ si: Mkăp pui mrâo, tĭng tla prăk pui, bi mlih mta phŭn hlăm klei kuôl kă blei yua pui kmlă… Phung ba yua dưi mŭt hlăm hla pŏk web www.dichvucong.gov.vn srăng dưi ba yua jih 12 hdră anei hŏng klei ênưih lehanăn pral./.

H’Nêč pô mblang