VOV4.Êđê- Hlăm dŭmhrue 22 – 23/9, knơ̆ng bruă pui kmlă Daklak hgŭm hŏng dŭm anôk bruă hlăm alŭ wăl mkŏ mjing leh knăm ba jao kơ gŏ sang Nguyễn Anh Huấn ti alŭ mrô 8, sa Êa Uy, kdriêk Krông Pač, lehanăn gŏ sang H'Lam Niê, ti ƀuôn Knul, să Êa Bông, kdriêk Krông Ana.Grăp boh sang hŏng ênoh 50 êklăk prăk, dŭm êpul êya lŏ iêo mkrum čiăng mâo mdơ̆ng sang jăk hĭn.

Snăn dŭm mlan êgao, Knơ̆ng bruă pui kmlă čar mâo mdơ̆ng leh truh 5 boh sang mđup brei kơ dŭm gŏ êsei ƀun, bruă anei dôk hlăm hdră mđup brei 70 boh sang, mâo knơ̆ng bruă pui kmlă kwar krah mđup brei kơ dŭm čar ti Lăn Dap kngư thŭn 2022.

Mbĭt hŏng bruă duh mkra, kah knar hlăm grăp thŭn, anôk bruă pui kmlă Daklak kah leh hlăm brô 1 êklai prăk pioh đru phung dôk hlăm klei dleh dlan, ngă klei myơr êrah, kuč mngač êlan ƀuôn sang. Tạ Minh, k'iăng khua knơ̆ng bruă pui kmlă Daklak lač:

Mbĭt hŏng bruă duh mkra, snăn anôk bruă pui kmlă lŏ mđing đru kơ bruă yang ƀuôn, ngă klei hdơr knga tla ai. Mâo klei bi đru mơ̆ng phung ngă bruă, snăn knơ̆ng bruă lŏ kah mơ̆ng keh đru ba kơ klei dleh dlan. Wưng leh êgao knơ̆ng bruă mâo rŭ mdơ̆ng brei leh dŭm boh sang kơ phung knap mñai. Bruă anei, dưi ngă nanao lehanăn srăng lŏ ngă hĭn mơh hlăm thŭn kơ anăp./.

Pô mblang: Y-Khem Niê