Aguah hruê 18/9, Phŭn bruă kđi čar brei leh klei blŭ kơ Hdră êlan duh bi liê mkra êlan treng êran pral Dưr - Dhŭng, leh hmư̆ klei hưn mơ̆ng Adŭ bruă knuă druh Đảng Phŭn bruă Êlan klông dŭ mdiăng Hưn mdah Hdră duh bi liê mkra êlan treng êran pral Dưr – Dhŭng lehanăn klei blŭ mơ̆ng dŭm anôk bruă, Phŭn bruă kđi čar bi trông lehanăn klah čŭn, anei jing hdră bruă yuôm bhăn lehanăn čiăng êdi.

Mta kñăm mkra êlan treng êran pral anei kñăm mkăp klei čiăng dŭ mdiăng, đru bi mkŏ hgŭm bruă dŭ mdiăng Dưr – Dhŭng jăk găl hĭn, hơĭt kjăp, mjing tur knơ̆ng, boh kdrŭt kơ hdră mđĭ kyar bruă duh mkra – ala ƀuôn, rơ̆ng klei êđăp ênang bruă lĭng kahan, klei êđăp ênang ala ƀuôn, đru hluê ngă dŭm hdră êlan mtrŭn mơ̆ng Đảng hlăm bruă duh bi liê mđĭ kyar anôk bruă êlan klông dŭ mdiăng hlăm Hdră êlan mđĭ kyar ala čar hluê si Hdră mtrŭn Klei bi kƀĭn tal XIII mơ̆ng Đảng lehanăn pŏk ngă hdră kčah ala čar. Phŭn bruă kđi čar tŭ ư akâo klei blŭ mơ̆ng Anôk kriê dlăng bruă Đảng gưl dlông hluê hdră duh bi liê ktuê êlan treng êran pral Dưr – Dhŭng êlâo kơ Knŭk kna ba mdah kơ Anôk bruă kƀĭn ala ti Klei bi kƀĭn tal 8, Anôk bruă kƀĭn ala gưl XV./.