Hlăm klei kƀĭn online mkŏ hŏng dŭm čar Khánh Hòa, Gia Lai leh anăn Dak Lak, Lâm Đồng, Tây Ninh, Khua Knŭk kna Phạm Minh Chính mñă ktang, klei hjan hlĭm êa lêč leh anăn bruă mgaih msir boh jhat mâo leh Phŭn bruă kđi čar, Khua gĭt gai Đảng Tô Lâm gĭt gai, tiŏ nao phung Khua hlăm phŭn bruă kđi čar nao ti dŭm alŭ wăl, čuă êmuh, mđĭ ai leh anăn mgaih msir boh jhat.

Hluê ngă bruă klam mơ̆ng Phŭn bruă kđi čar, 4 êpul ngă bruă mơ̆ng Đảng, Knŭk kna lŏ dơ̆ng nao ti dŭm alŭ wăl, hlăm anăn, Khua hlăm êpul bruă Đảng Trần Cẩm Tú nao ti čar Khánh Hoà, k’iăng Khua Knŭk kna Nguyễn Hòa Bình nao ti čar Dak Lak, Khua phŭn bruă lĭng kahan Phan Văn Giang ti Gia Lai, khua dhar bruă mặt trận čar kwar Việt Nam Bùi Thị Minh Hoài nao ti Lâm Đồng.

Klă anăp nao gĭt gai bruă mgaih msir boh jhat yan adiê ngă ti čar Khánh Hoà, Khua hlăm êpul bruă Đảng Trần Cẩm Tú mñă kơ čar Khánh Hoà lŏ dơ̆ng hluê ngă klei gĭt gai mơ̆ng Phŭn bruă kđi čar, Êpul khua bruă Đảng, Khua gĭt gai Đảng Tô Lâm, mơ̆ng Knŭk kna, Khua Knŭk kna, mñă kơ gưl bruă Đảng nah gŭ, Bruă sang čư̆ êa dŭm gưl nao čuă êmuh, mđĭ ai gŏ sang mâo mnuih djiê, luč, kriê dlăng kơ phung êka.

“Tiŏ nao jih jang grăp ai dưi, mnơ̆ng yua čiăng êdi, đru hŏng grăp hdră, đru kơ mnuih ƀuôn sang dôk ktlah hjăn ti dŭm anôk dôk êa lip kjham. Bruă sang čư̆ êa alŭ wăl čiăng rơ̆ng mâo anôk dôk êjai êđăp ênang, mkăp brei djăp mnơ̆ng yua čiăng êdi kơ mnuih ƀuôn sang, kriê dlăng phung mduôn khua, phung hđeh, phung mniê ba tian, phung awăt êdu, amâo dưi brei kƀah sang hră, kƀah adŭ hriăm kơ phung hđeh, kƀah anôk mdrao klei ruă kơ mnuih ƀuôn sang.”

          Wưng anei, bi ala kơ khua gĭt gai Đảng, Knŭk kna, Khua hlăm Êpul bruă Đảng Trần Cẩm Tú jao 20 êklai prăk kơ bruă Đảng, Bruă sang čư̆ êa leh ană mnuih ƀuôn sang čar Khánh Hoà.

Leh truh ti tač êdeh phiơr Cam Ranh (čar Khánh Hoà) hlăm mmăt mlam, k’iăng Khua Knŭk kna Nguyễn Hoà Bình nao mtam ti anôk êa lip kjham ti ƀuôn hgŭm Đông Hoà, čar Dak Lak. K’iăng Khua Knŭk kna bi juh kyua dŭm klei luč liê, ênguôt hnĭng mnuih ƀuôn sang dôk tŭ leh anăn mñă klă, Đảng, Knŭk kna amâo srăng lui mnuih ƀuôn sang dôk hjăn păn. Grăp klei đru srăng dưi ngă pral leh anăn tŭ dưn hĭn.

Hlăm mmông dleh dlan ară anei yuôm bhăn hĭn jing anak mnuih, hluê si klei mtô mơ̆ng lĭng kahan, kahan ksiêm hriê truh tinei jing yuôm bhăn êdi, mnơ̆ng hnuă, sang pưk drei dlăng êdei, Đảng, Knŭk kna srăng đru êdei. Lŏ uêñ mĭn kơ ngăn drăp ăt dôk lu klei amâo mâo jăk sơnăk. Mnuih jing yuôm bhăn, phung hđeh êđăp ênang truh tinei mơak êdi leh. Ară anei bruă tal êlâo jing đru dŏng anak mnuih.

K’iăng Khua Knŭk kna bi klă leh hdră mtrŭn đru mjêč dŭm êbâo êklai prăk kơ 4 čar Khánh Hoà, Lâm Đồng, Gia Lai leh anăn Dak Lak. Phŭn bruă lĭng kahan tiŏ nao hlăm brô 45 êbâo gưl čô lĭng kahan mbĭt hŏng dŭm êbâo êdeh êdâo, dŭ mdiăng, mbha mnơ̆ng, tiŏ nao êdeh dakwak nao ba mnơ̆ng đru kơ mnuih ƀuôn sang krĭng êa lêč. Êpul kahan ksiêm tiŏ nao dŭm êtuh êbâo čô knuă druh, lĭng kahan leh anăn êpul răng mgang klei êđăp ênang nah gŭ, mbĭt hŏng dŭm mta mnơ̆ng yua ngă klei bi mdrơ̆ng, mgaih msir boh jhat klei êa lip lêč. Phŭn bruă lŏ hma leh anăn wăl hdĭp mda iêo mkrum leh dŭm êpul bruă lu ala čar đru brei mnơ̆ng ƀơ̆ng, êa mnăm kơ mnuih ƀuôn sang anôk êa lip ti dŭm čar Gia Lai leh anăn Dak Lak, mbĭt anăn đru 1.500 huôm ƀung hdang krô kơ Dak Lak. Phŭn bruă ngăn prăk mkăp leh 4000 tôn briah đru kơ dŭm čar Gia Lai, Khánh Hoà. Phŭn bruă mdrao mgŭn tiŏ nao, mkăp brei 6 tôn êa drao leh anăn 150.000 asăr êa drao kar êa, 3000 kdô kar êa gŏ sang čiăng êdi kơ krĭng êa lip.