Leh hmư̆ pô bi ala Êpul khua kiă kriê bruă duh mkra gưl dlông hâo mdah, mâo klei blŭ mơ̆ng dŭm anôk bruă, Phŭn bruă kđi čar bi trông leh lehanăn mâo klei bi tŭ ưkơ jih jang hdră êlan mă bruă. Blŭ klah čŭn ti anôk bi kƀĭn, Khua gĭt gai Tô Lâm mñă ƀuôn prŏng lŏ dơ̆ng ksiêm duah, mkŏ mjing dŭm klei bhiăn djŏ hŏng klei jing ti ƀuôn prŏng Hải Phòng kñăm bi tă êlan kjăp djŏ hlăm klei mđĭ kyar truh thŭn 2030, lehanăn hlŏng truh kơ thŭn 2045.

Ăt hlăm aguah mbrue, Phŭn bruă kđi čar mâo klei bi kƀĭn mă klei blŭ kơ bruă rŭ mdơ̆ng ƀuôn prŏng Huế dôk hlăm gưl dlông. Khua gĭt gai Tô Lâm mtă, bruă rŭ mdơ̆ng ƀuôn prŏng Huế dôk hlăm gưl dlông, bi êdah klă klei êpa mhao, klei sa ai mơ̆ng jih jang mnuih ƀuôn sang, mjing boh kdrŭt kơ Thừa Thiên Huế lŏ dơ̆ng mâo klei dưn yua jih knhuah gru cách mạng kdrăm k’ah, bi kriê pioh, mđĭ lar klei tŭ yuôm mơ̆ng ƀuôn prŏng đưm, jiă knhuah gru dhar kreh Huế, rŭ mdơ̆ng ƀuôn prŏng Huế jing anôk phŭn kơ alŭ wăl kwar krah, bi năng hŏng klei gưl dlông Đảng, Phŭn bruă kđi čar, lehanăn mnuih ƀuôn sang kluôm ala čang hmăng./.