VOV4.Êđê - Aguah anei (14/10), ti Hà Nội, Phŭn bruă kđi čar, Êpul khua kiă kriê bruă Đảng gưl dlông mkŏ mjing klei bi kƀĭn hlue nga hdră mtrŭn mơ̆ng Phŭn bruă kđi čar kơ klei mđĭ kyar, lehanăn răng mgang klei êđăp ênang ti Lăn Dap Kngư truh kơ thŭn 2030, lehanăn tă hdră truh kơ thŭn 2045.

Khua gĭt gai Đảng Nguyễn Phú Trọng kiă kriê lehanăn mâo klei blŭ. Mrâo anei, nao lehanăn blŭ hrăm ti anôk bi kƀĭn hlue ngă hdră mtrŭn mrô 10 lehanăn bi mklă mrô 12 mơ̆ng Phŭn bruă kđi čar kơ klei mđĭ kyar bruă duh mkra lehanăn răng mgang klei êđăp ênang ti Lăn Dap Kngư, Khua knŭk kna Phạm Minh Chính mñă kơ dŭm klei hriăm yuôm bhăn čiăng bi thâo săng, lehanăn ngă bi djŏ bruă klam hlăm krĭng hŏng lăn čar, ti jih jang djăp gưl dhar bruă, lač klă kơ bruă mđĭ kyar Lăn Dap Kngư jing kluôm hlăm jih bruă kđi čar, kơ klei mĭn, bruă duh mkra, kơ wăl hdĭp mda, bruă răng mgang klei êđăp ênang, hdră êlan djuê ana, klei đăo mđĭ klei tŭ dưn bruă hƀuê ênuk, bi hdơr kơ knhuah gru cách mạng, bi hĭn klei thâo bi mguôp, mâo hdră êlan iêo jak klei duh bi liê hlăm yang ƀuôn lehanăn mơ̆ng ala tač êngao./.

VOV TâyNguyên/ Pô mblang: Y-Khem Niê