VOV4.Êđê - Tlam 6/2, Êpul kahan 916, Êpul kahan êdeh phiơr 371, Êpul kahan hlăm wăl adiê pla leh êbeh 5000 phŭn kyâo hlăm knăm pŏk ngă pla ana kyâo hdơr nanao kơ Awa Hồ, mđing truh kơ hdră pla sa êklai ana kyâo - kyua sa Việt Nam mtah thŭn 2022 mơ̆ng Phŭn bruă lĭng kahan mkŏ mjing. Pŏk ngă hdră Tết pla kyâo, Đại tướng Phan Văn Giang, Khua phŭn bruă lĭng kahan lač klă thŭn 2022, jih jang êpul lĭng kahan gĭr ktưn pla 3 êklăk 3 êtuh êbâo phŭn kyâo leh anăn êben 2.400 ha dliê. Čiăng bi leh hdră kñăm Khua phŭn bruă lĭng kahan Phan Văn Giang mtă kơ dŭm anôk bruă lŏ dơ̆ng ngă jăk hĭn bruă hâo hưn, mtô bi hriăm, mđĭ klei thâo săng hlăm êpul lĭng kahan kơ bruă klam, klei yuôm bhăn mơ̆ng bruă pla dliê, bruă răng mgang dliê, răng mgang wăl hdĭp mda, mjing hdră pŏk mlar êlam hlăm jih êpul lĭng kahan, đru mguôp bi hrŏ klei hmaĭ mơ̆ng klei bi mlih yan adiê, mđĭ hnơ̆ng jăk klei hdĭp mda.

H’Zawut pô mblang