VOV4.Êđê- Phŭn bruă mdrao mgŭn mrâo mâo leh klei akâo kơ hdră êlan mkŏ mjing klei bi lông jih gưl 3 thŭn hriăm 2022 kơ phung hđeh hriăm hră djŏ klei ruă tưp Covid 19. Hlăm anăn hŏng phung hđeh F0, hlăk mâo klei dôk mdrao mgŭn, bi ktlah ti sang ƀri hlăm wưng mkŏ mjing klei bi lông, srăng mâo hdră êlan ksiêm dlăng kơ digơ̆ dưi yap jih gưl 3. Bi hŏng phung hđeh mâo klei čiăng nao bi lông, snăn bi mâo hră akâo mơ̆ng phung hđeh čiăng nao bi lông, lehanăn mâo klei bi klă mơ̆ng amĭ ama amâodah mnuih kiă tŭ ư, hlăm anăn mâo klei ƀuăn mơ̆ng phung hđeh êjai hluê ngă kjăp klei bi ktlah mdrơ̆ng hŏng klei ruă tưp, msĕ si mkŏ mjing adŭ hjăn kơ hđeh F0 bi lông. Bi hđeh hriăm hră jĕ êrô hŏng F1 dưi nao hlăm klei bi lông, hŏng phung hđeh yap amâo hmăi hŏng klei ruă tưp ôh. Bi phung hđeh jing dôk đing dưi nao hlăm klei bi lông. Êpul gơ̆ng kiă kriê klei bi lông brei hđeh bi lông jing phung đing mâo klei ruă, snăn mkŏ mjing bi lông hlăm adŭ hjăn djŏ hŏng bruă mdrơ̆ng hŏng klei ruă tưp./.

Pô mblang: Y-Khem Niê