VOV4.Êđê- Hruê mbruê 30/6, êpul ksiêm dlăng mơ̆ng phŭn bruă mtô mjuăt bi hriăm mơ̆ng k’iăng khua phŭn bruă Nguyễn Văn Phúc jing khua êpul mâo leh mmông mă bruă hŏng êpul gĭt gai klei bi lông bi ruê̆ klei hriăm gưl 3 thŭn 2022 čar Dak Lak kơ bruă mkŏ mjing klei bi lông. Hlăm klei ksiêm dlăng, êpul yap yuôm bhăn bruă prăp kơ klei bi lông anei ti čar Dak Lak, mơ̆ng bruă rơ̆ng kơ mnơ̆ng yua truh kơ bruă mtô mjuăt phung knuă druh nao đru hlăm klei bi lông, mă klei bi lông, dŭ ba klei bi lông leh anăn djă klei bi lông djŏ hŏng hdră bhiăn.

Êpul ngă bruă mtă kơ knơ̆ng bruă mtô mjuăt bi hriăm čar Dak Lak bi mguôp kjăp hŏng dŭm anôk bruă djŏ tuôm mprăp kơ kơ djăp mta bruă hlăm klei bi lông. Hlăm anăn uêñ mĭn hĭn kơ bruă mtô mjuăt hdră bhiăn bi lông kyua thŭn anei mâo lu klei mlih mrâo. Hlăm klei bi lông gưl anei, čar Dak Lak mâo êbeh 20.400 čô hđeh nao bi lông. Čar dăp leh 32 anôk bi lông hŏng 869 adŭ bi lông ti alŭ wăl 15 kdriêk, wăl krah leh anăn ƀuôn prŏng.

Pô mblang: Y-Ƀel Êban