VOV4.Êđê - Hruê mbruê 4/5, phŭn bruă mtô mjuăt bi hriăm mơĭt leh hră mtrŭn kơ khua kiă kiă kriê dŭm knơ̆ng bruă mtô mjuăt bi hriăm kơ bruă mđĭ hĭn dŭm hdră êlan gang mkhư̆ klei mgăt êa kơ phung hđeh êlăk, hđeh sang hră. Hră mtrŭn anei mtă kơ dŭm knơ̆ng bruă mtô mjuăt bi hriăm lŏ dơ̆ng gĭt gai hluê ngă mâo boh tŭ dưn dŭm hră mơar gĭt gai mơ̆ng Khua knŭk kna, khua phŭn bruă mtô mjuăt bi hriăm kơ bruă gang mkhư̆ klei kpĕ êka, klei ngăt êa kơ phung hđeh êlăk, hđeh sang hră. Dŭm knơ̆ng bruă pŏk gưl hâo hưn, mtô mjuăt kñăm mđĭ klei thâo săng čiăng kơ phung hđeh sang hră dưi thâo leh anăn hluê ngă dŭm hdră êlan gang mkhư̆ klei mngăt êa, boh nik jing dŭm anôk mâo klei arưp aram, mtô lač kah mbha klei thâo, klei ngă bruă gang mkhư̆ klei mngăt êa hlăm dŭm sang hră, adŭ hriăm êlâo kơ hđeh mdei sang hră yan hjan, mtrŭt mđĭ bruă mtô êluê êa, klei êđăp ênang kơ hđeh sang hră hlăm dŭm sang hră. Gĭt gai mđĭ hĭn bruă bi mguôp plah wah sang hră hŏng gŏ sang, êpul êya leh anăn bruă sang čư êa alŭ wăl čiăng kriê dlăng hđeh sang hră hlăm mmông mdei sang hră, rơ̆ng klei êđăp ênang, gang mkhư̆ klei mngăt êa.

Y-Ƀel pô mblang