VOV4.Êđê- Hruê 10/6, ti ƀuôn prŏng Đà Nẵng, Phŭn bruă Sang hră m’ar mtô bi hriăm mtrŭt mjhar hdră bi hriăm luê êđăp ênang, gang mkhư̆ klei mngăt hlăm êa lehanăn mphŭn pŏk Klei bi lông luê hŏng phung hđeh gưl 3 kluôm ala thŭn 2022. Knăm anei mkŏ mjing mơ̆ng hruê 8 – 13/6 hŏng klei nao hgŭm mơ̆ng 700 čô hriăm hră ti 26 čar, ƀuôn prŏng kluôm ala. Khădah klei mngăt hlăm êa ti ala čar drei mâo klei bi êdah hrŏ ƀiădah grăp thŭn ăt mâo hlăm brô 2.000 čô djiê, lu êdi ti krĭng Ngŏ Dhŭng Asi lehanăn lu hĭn 8 blư̆ mkă hŏng dŭm ala čar đĭ kyar. Thŭn 2022, Phŭn bruă Sang hră m’ar mtô bi hriăm gĭt gai ngă bi leh hră m’ar ktrâo lač kơ hdră gang mkhư̆ klei mngăt hlăm êa, dŭm mta hră m’ar, kdrêč mdar video ktrâo lač kơ hdră gang mkhư̆ klei mngăt hlăm êa ti phung hđeh. Mbĭt anăn, mkŏ mjing adŭ mjuăt bi hriăm gang mkhư̆ klei mngăt hlăm êa, mtô bi hriăm luê, dŏng mtlaih phung mngăt êa êđăp ênang kơ 400 čô knuă druh, nai mtô mơ̆ng 63 Knơ̆ng bruă Sang hră m’ar mtô bi hriăm.

                                                    Pô mblang: H’Nêč Êñuôl