VOV4.Êđê - Hruê anei 5/5, anôk bruă mtrŭt mđĭ klei mnia mblei bi mguôp hŏng dŭm anôk mnia mblei Việt Nam ti ASEAN mkŏ mjing gưl đru kčĕ bruă mnia mblei braih mdiê truh ti anôk mnia mblei ASEAN. Bruă anei dưi mkŏ mjing klă anăp ti čar An Giang bi mguôp êlan online hŏng mbah Zoom leh anăn mđung ti mbah fanpage Facebook anôk bruă mtrŭt mđĭ klei mnia mblei, phŭn bruă tuh tia. Hlăm gưl đru kčĕ srăng mkăp mmông đrŭ kčĕ kơ dŭm boh klei mơ̆ng dŭm knơ̆ng bruă djŏ tuôm hŏng bruă mđĭ kyar klei mnia mblei braih mdiê truh ti anôk mnia mblei ASEAN. Êngao kơ Philippines, braih mdiê mơ̆ng Việt Nam lŏ dưi ba čhĭ hlăm dŭm ala čar mkăn hlăm ASEAN msĕ si: Malaysia, Singapore, Indonesia, Brunei. Klei mnia mblei braih mơ̆ng Việt Nam lŏ dơ̆ng đĭ hlăm dŭm mta briah bâo mngưi, braih japonica, braih kô̆ hŏng ênoh čhĭ yuôm hĭn. Mta kñăm mnia mblei braih mơ̆ng ala čar ăt mâo leh klei mkra mlih, truh thŭn 2030, mĭn tĭng knŏng dôk mă 4 êklăk tôn.

Y-Ƀel pô mblang