Hruê mbruê 16/3, ti Hà Nội, Phung khua hlăm phŭn bruă kđi čar, khua Phŭn bruă hŏng tač êngao Lê Hoài Trung, khua Phŭn bruă lĭng kahan Phan Văn Giang leh anăn khua phŭn bruă kahan ksiêm Lương Tam Quang mbĭt hŏng khua Phŭn bruă hŏng tač êngao China Vương Nghị, Khua phŭn bruă lĭng kahan China Đổng Quân leh anăn khua phŭn bruă kahan ksiêm China Vương Tiểu Hồng hrăm mbĭt gĭt gai Klei kƀĭn trông gưl tal 1 Blŭ hrăm hdră êlan  “3+3” gưl khua phŭn bruă hŏng tač êngao, Lĭng kahan, Kahan ksiêm Việt Nam - China.

Hlăm klei kƀĭn trông, dua tĭng bi tŭ ư bi klă kơ hdră êlan đĭ kyar jăk hluê hdră tă “6 hĭn” mơ̆ng klei mjĕ giăm Việt Nam - China hlăm wưng êgao. Kha mbha kơ dŭm boh klei pral, dleh ksiêm dlăng dlông rŏng lăn, hlăm alŭ wăl hlăm wưng êgao, dua tĭng bi tŭ ư lač bruă dua ala čar mđĭ hĭn klei hgŭm mguôp, bi kjăp klei đăo knang kđi čar, gĭt gai kluôm plah wah đĭ kyar leh anăn klei êđăp ênang, nao kjăp hŏng hdră êlan yang ƀuôn ngă phŭn, hrăm mbĭt kyua êpul êya tar rŏng lăn bi mdrơ̆ng hŏng dŭm klei lông dlăng mbĭt kơ klei êđăp ênang leh anăn mđĭ kyar hŏng klei djŏ hdră bhiăn tar rŏng lăn leh anăn hdră bhiăn phŭn Êpul hgŭm lu ala čar jing năng mjêč êdi. 3 čô khua phŭn bruă China mñă klă dlăng yuôm leh anăn mprăp mbĭt hŏng Việt Nam ngă klei thâo săng gưl dlông, bi hriăm hdơ̆ng pô, kah mbha klei hriăm kơ bruă mkŏ mjing Đảng, kiă kriê lăn čar, răng mgang kjăp boh tŭ klei êđăp ênang leh anăn mđĭ kyar mơ̆ng grăp lăn čar.