Hlue si klei dưi đru gang mkhŭ klei ruă tưp hlue si Hdră mtrŭn mrô 16 thŭn 2021 mơ̆ng Knŭk kna, leh lu gưl tĭng tla, truh wưng anei čar Dak Nông ăt dôk đuôm nư phung knuă druh mdrao mgŭn kơ dŭm ênoh prăk êbeh 32 êklai prăk. Hâo hưn kơ bruă anei, Huỳnh Thanh Huynh, K’iăng Khua Knơ̆ng bruă mdrao mgŭn čar Dak Nông brei thâo:

Bruă mdrao mgŭn bi hgŭm hŏng bruă ngăn prăk kčĕ kơ Knơ̆ng bruă sang čư̆ êa čar čiăng mâo hdră ruh mgaih, snăn ară anei mâo Knơ̆ng bruă sang čư̆ êa čar mbŏ hdră tĭng tla prăk knŭk kna thŭn 2023, hlăm anăn mbŏ prăk tla kơ ayŏng adei hlăm dŭm thŭn 2020, 2021 leh anăn 2022 jing êbeh 32 êklai prăk.

 Hlăm klei bi kƀĭn hŏng phung čih klei mrâo mrâo anei, Tôn Thị Ngọc Hạnh, K’iăng Khua Knơ̆ng bruă sang čư̆ êa čar Dak Nông, hâo hưn, mâo lu mta phŭn ngă kơ čar êmưt tĭng tla klei dưi đru kơ phung knuă druh mdrao mgŭn đru gang mkhư̆ klei ruă tưp Covid-19. Sa kdrêč kyua čar adôk dleh dlan, dleh mbha ênoh bi liê, sa kdrêč kyua hlue ngă kjăp hlue si hdră bhiăn. Ară anei dŭm klei gun kpăk anei dưi ruh mgaih:

Hlăm dŭm hruê êgao hmei hlue ngă klei gĭt gai kjăp snăk hŏng Knơ̆ng bruă mdrao mgŭn, Knơ̆ng bruă ngăn prăk čiăng msir mgaih jih klei dưi dưn kơ bruă mdrao mgŭn, khădah ară anei brei rơ̆ng hdră, amâo brei mâo dŭm klei soh, anăn êmưt hlue ngă. Ară amei snăn bruă anei mprăp tĭng tla, mrâo êgao hmei ăt duah leh dŭm phŭn prăk, ară anei brei dôk guôn ngăn prăk knŭk kna thŭn 2022, leh anăn hmei srăng mă mơ̆ng lu bruă mkăn čiăng msir mgaih hdră êlan kơ bruă mdrao mgŭn. Čar mđing dlăng, ƀiădah kyua klei amâo dưi hlue ngă, čar ƀun, prăk bi liê amâo mâo anăn dleh dlan snăk.

 Hruê kăm êgao, hruê 3/6, Klei bi kƀĭn tal 20 mơ̆ng Anôk bruă gĭt gai ala čar gang mkjư̆ klei ruă tưp Covid-19 bi kƀĭn online hŏng dŭm alŭ wăl. Klei bi kƀĭn anei bi trông, ksiêm dlăng leh anăn mđing kơ bruă hưn mdah jih klei ruă Covid-19 ti Việt Nam. Mrâo anei Khua knŭk kna Phạm Minh Chính gĭt gai Phŭn bruă mdrao mgŭn mprăp dưm Covid-19 mơ̆ng klei ruă tưp êpul A kơ êpul B (jing klei ruă mơ̆ng êpul huĭ hyưt tưp lar ktang, ênoh mnuih djiê lu kơ êpul mâo klei ruă tưp huĭ hyưt srăng tưp lar pra, truh kơ djiê) leh anăn truh kơ klei hưn mdah jih klei ruă tưp ti Việt Nam.

            Mbĭt hŏng bruă hưn mdah klei ruă Covid-19, êngao kơ klei bi kƀĭn tal 5, bruă kƀĭn ala gưl 15, phung bi ala ăt mtă bi mklă boh klei mâo, tĭng tla hŏng ngăn drăp jing masin, kdrăp mdrao mgŭn hŏng ngăn drăp dưi đru, ñĕ kơ klei dưm hlăm hjiê, mâo hdră msir ñĕ kơ klei luč liê mang hŏng klei găl yuôm bhăn dưi iêô mkrum. Pô bi ala Trần Văn Lâm, êpul Bắc Giang, Khua Knơ̆ng bruă ngăn prăk, Hdră êlan mơ̆ng Bruă kƀĭn ala lač tinei mâo mta phŭn jing ngăn drăp ka djăp klei găl, hră mơar ba kriê dlăng, ba yua msĕ si mnơ̆ng knŭk kna:

"Hlăm wưng klei ruă tưp arăng blei masin mâo mnuih mba, amâo mâo ôh pô mĭn si srăng jing ngăn drăp knŭk kna? Brei mâo hră mơar, ênoh ba yua hnơ̆ng kčah hdră mnêč si ngă. Klei anei hlăm klei bhiăn ngăn prăk ăt brei leh, čih ba yua, kơ ênoh amâo guôn čih ôh, knŏng tơdah ngăn drăp anei ba čhĭ, snăn kơ ksiêm dlăng. Hlăk êjai dôk guôn snăn čih jing ngăn drăp êngao anăn bi mklă, leh anăn ba yua tŭ dưn.

Phung bi ala bruă kƀĭn ala ăt lač čiăng kơ Việt Nam ba Covid-19 mơ̆ng klei ruă tưo êpul A jing êpul B. Jing mơ̆ng êpul huĭ hyưt jing êpul klei ruă tưp huĭ hyưt leh anăn dlăng anei jing klei ruă mkăn, msir mgaih leh anăn tĭng tla ăt brei hlue ngă msĕ si klei ruă mkăn. Dlăng kluôm, pô bi ala Tạ Văn Hạ, Quảng Nam lač ăt brei hưn brei răng leh anăn lŏ dơ̆ng răng hŏng mta mrâo:

        “Kơ klei kreh knhâo mkŏ mjing mdrao mgŭn dlông rŏng lăn hưn mdah leh. Tal dua jing hlăm boh sĭt Việt Nam klei hdĭp mda, ala ƀuôn ară anei msĕ yang đar leh. Hnơ̆ng huĭ hyưt mơ̆ng kei ruă tưp mta mrâo hdjul leh, pral hĭn. Mơ̆ng klei găl anăn brei drei hưn jih klei ruă tưp, ƀiădah ăt brei răng kơ mta mrâo”

        Mơ̆ng 3 thŭn gang mkhư̆ klei ruă tưp brei ƀuh dŭm klei gĭr mơ̆ng djăp êpul mnuih ƀuôn sang, hrăm mbĭt gang mkhư̆ klei ruă tưp ƀiădah ăt mâo lu klei năng hơưi tăm mâo. Anei jing klei hriăm mjêč mprăp kdrăp mnơ̆ng, hră mơar, hdră êlan ktrâo lač čiăng mdrơ̆ng jăk hĭn kơ dŭm klei ruă mkăn tăm bluh mâo./.