VOV4.Êđê- Lu bruă duh mkra ti čar Dak Lak mphŭn lŏ wĭt đĭ kyar leh wưng sui hmaĭ kyua Covid-19. Dŭm anôk bruă duh mkra ti čar dôk gĭr ktưn mđĭ ktang mkra mjing mnia blei leh klei ruă tưp ƀrư̆ hruê ƀrư̆ dưi msưh kdŭn. Lu boh kdrŭt mrâo dưi mjing kơ wưng đĭ kyar mrâo ti alŭ wăl.

 Hlăm anôk ksiêk mbha, lehanăn đŭng hruh mnơ̆ng sang mkra mjing biêr Sài Gòn Daklak - knơ̆ng bruă biêr kwar krah, mnuih ngă bruă hlăk mjêč gai êdeh pioh dăp, dŭ ba mnơ̆ng leh mkra mjing, ba kơ hjiê pioh. Dŭm boh êdeh bi kduê nao mŭt hlăm sang mkra mjing, snăn brei ƀuh leh dua thŭn hmăi mơ̆ng klei ruă tưp Covid 19. Lại Thế Nguyên, mnuih ngă bruă ti sang mkra mjing bier Sài Gòn Daklak brei thâo, mơ̆ng leh Tết nguyên đán 2022, jih jang bruă mơ̆ng sang mkra mjing lŏ kơrŭ wĭt leh truh 80% hnơ̆ng mă bruă, mnuih ngă bruă lŏ wĭt mă bruă msĕ si aguah tlam lehanăn jih jang mnuih ngă bruă hlăk dôk bi ktưn, čiăng bi leh bruă knuă êgao hdră kčah mơ̆ng knơ̆ng bruă.

“Phung ayŏng adei mnuih ngă bruă, mbĭt hŏng jih jang knuă druh bi ktưn ngă bi leh bruă kčah jao čiăng bi djăp ênoh čuăn knơ̆ng bruă mtrŭn leh. Gĭr ktưn hlăm thŭn anei srăng bi leh bruă čuăn, lehanăn dưi mâo mnơ̆ng jăk hĭn kơ thŭn dih”.

Knơ̆ng bruă dŭ mdiăng An Phước, Daklak ăt dôk găn klei dleh dlan hĭn, hŏng 107 êbâo tôn mnơ̆ng mâo dŭ mdiăng leh hlăm 3 mlan êgao. Phạm Đông Thanh, Khua knơ̆ng bruă anei brei thâo: Ară anei knơ̆ng bruă djăp leh ênŭm klei dưi tiŏ nao êdeh. Mbĭt hŏng jih jang ênoh mnơ̆ng mơ̆ng phung tue čoh čuăn mâo leh mơ̆ng êlâo, knơ̆ng bruă lŏ mâo lu klei akâo dŭ mdiăng brei mnơ̆ng mkăn. Ñu brei thâo, boh tŭ dưn anei mâo hĕ kyua phung khua kiă kriê Knơ̆ng bruă, dưi mghaih msir leh bruă knuă amâo mâo lŏ mđĭ ôh ênoh mưn dŭ mdiăng ƀiă ăt djăp hnơ̆ng mâo ba wĭt kơ knơ̆ng bruă, êjai hlăm wưng êa săng êa pui lehanăn lu ênoh prăk tăk mkăn đĭ nanao:

        “Hmei mkra leh hdră mă bruă, tui duah lu anôk mkăp čiăng mâo hdră êlan đru kơ phung duh mkra ngă bruă ăt msĕ si aguah tlam mơh. Êngao anăn lŏ dơ̆ng mâo dŭm hdră êlan čiăng thâo mkiêt mkriêm ênoh êa săng êa pui, gĭr tui duah mâo nanao mnơ̆ng mdiăng, amâo mâo êran êdeh hŏng ôh. Hnơ̆ng ênoh dăp bŏ mnơ̆ng êran wĭt nao, čiăng bi mâo lu hĭn mnơ̆ng amâo mâo đĭ êdeh hŏng liê êa pui ti hơăi”.

Knŏng bruă dŭ mdiăng êdeh ô tô An Phước dôk ngă bruă jih hnơ̆ng mơ̆ng 130 boh êdeh adôk mâo

Leh găn hlăm dŭm mlan dleh dlan hĭn êdi, klei hdĭp mda ala ƀuôn ti Daklak ară anei lŏ wĭt msĕ si aguah tlam. Êyui mmăt mơ̆ng klei ruă tưp amâo lŏ dôk bi mhuĭ ôh leh jih jang phung hđeh lŏ dơ̆ng nao sang hră mơar, jih jang sang êa drao jing jai dưi bi leh bruă pô, lehanăn ƀrư̆ ƀrư̆ lŏ bi wĭt kơ dŭm boh sang hră. Hlăm ai êwa anăn, bruă hiu čhưn ênguê lŏ mđĭ hĭn ai ktang čiăng kơrŭ bruă. Aduôn Nguyễn Thị Phương Hiếu, k’iăng khua knơ̆ng bruă dhar kreh, mjuăt asei, lehanăn hiu čhưn ênguê čar Daklak brei thâo, klei lŏ kơrŭ bruă hiu čhưn ênguê Daklak jing knang hlăm dŭm hdră êlan hâo hưn kơ bruă hiu čhưn ênguê hŏng klei mbruă hĭn, mâo klei tŭ jing hĭn hlăm djăp mta bruă hâo hưn. Hŏng klei bi mguôp, lehanăn pŏk mlar djăp mta bruă hiu čhưn ênguê, lehanăn knang kơ dŭm klei gĭr mđĭ hnơ̆ng jăk, bi mrâo lu mta mnơ̆ng kơ bruă hiu čhưn ênguê mơ̆ng dŭm anôk duh mkra:

“Pô ngă bruă hâo hưn hlăm dua thŭn leh êgao jing lu lehanăn bŏ hŏng klei ktang, mơ̆ng anăn phung tue hiu čhưn diñu ƀuh klei jing ti Daklak, lehanăn diñu duah anôk pô, kut kat duah êlan bi mâo hriê hŏng Daklak, snăn hlăm wưng Tết, lehanăn knăm mdei hrue bi hdơr kơ phung mtao Hùng, snăn mâo lu snăk tuê truh, lehanăn ară anei, ênoh tue hriê čhưn, lehanăn bruă mơ̆ng dŭm anôk duh mkra hlăk dôk gĭr hĭn êdi duah êlan bi mguôp hŏng djăp alŭ wăl. Čiăng lŏ mđĭ ênoh tue truh hŏng Daklak, snăn pô bi mguôp ktang hĭn hŏng Khánh Hoà, Đà Nẵng.”

Dŭm klei huăn mnăm ti êngao dưi mkŏ mjing ti dŭm anôk hiu čhưn ênguê jing klei ruah mơ̆ng phung tuê hriê čhưn ti Dak Lak

Kñăm ngă jăk hĭn ênoh čuăn kơrŭ bruă duh mkra ala ƀuôn thŭn 2022 - 2023, mrâo leh êgao Knơ̆ng bruă sang čư̆ êa čar Daklak mâo leh hdră bi kơrŭ bruă, lehanăn mđĭ kyar hlăm thŭn 2022 - 2023, hlăm anăn bi kơrŭ pral jih jang bruă duh mkra mnia mblei hlăm čar, mtrŭt mđĭ ai ktang klei đĭ kyar, duh tal êlâo kơ dŭm bruă yuôm bhăn, rơ̆ng bi leh ênŭm ênoh čuăn mtrŭn. Nguyễn Đình Trung, Khua bruă Đảng čar Daklak brei thâo:

“Čar hlăk dôk bi čuăl mkă, wăt bruă djă yua lăn, čuăl mkă dŭm krĭng mđĭ kyar. Rơ̆ng bi mâo hnơ̆ng kjăp, năng hŏng bruă duh bi liê truh hŏng čar, mmông anăn kơh diñu bi ksiêm dlăng lehanăn bi klă bruă srăng duh bi liê. Bruă tal dua jing mâo klei bi mguôp plah wah dŭm phung ngă bruă, lehanăn bruă klam mơ̆ng čar, srăng jing pô ngă klei bi mguôp plah wah phung ngă bruă hlăm djăp mta bruă duh mkra. Klei tal 3 jing bruă hrui blei jih mnơ̆ng dhơ̆ng, lehanăn mâo klei bi hgŭm kjăp hlăm bruă mkra mjing, lehanăn jih jang bruă nah gŭ. Dôk hlăm knua klei dưi mơ̆ng čar, srăng mjing djăp mta klei găl hĭn”.

Phung tuê hiu čhưn dlăng, hlăp lêñ ti wăl hiu čhưn ênguê Ko Tam

Ƀri knăm bi hdơr hrue kwar Dhŭng mâo klei êngiê, lehanăn hrue mnuih ngă bruă tar rŏng lăn, Daklak knư̆ hĭn mơh drông lu klei bi knăl jăk kơ bruă duh mkra, tue hrie bŏ sang jưh, djăp anôk hlăp mbul, anôk čhưn dhing. Dŭm alŭ wăl duh mkra ti čar hlăk pŏk phai ƀăng drông mnuih ngă bruă, bruă čhĭ mnơ̆ng kơ ala tač êngao hlăk lŏ dơ̆ng đĭ hĭn mâo êbeh 1 êklai dolar msĕ hŏng thŭn dih. Dŭm đang boh vải, boh êrang hlăk čhuang hlăm yan pĕ boh, hŏng boh mnga mâo lehanăn čhĭ yuôm, hlăk mjing leh ênoh ba wĭt hơĭt kơ mnuih pla mjing... Jih jang klei bi knăl jăk anăn hlăk pŏk sa klei čang hmăng kơ bruă lŏ kơrŭ, mđĭ kyar klei duh mkra ti Daklak./.

            Pô mblang: Y-Khem Niê