Ti krah wăl anôk êđăp drưm ti Kđông kahan răng mgang knông lăn Sê Rê Pôk, ti să Krông Ana, kdriêk Ƀuôn Đon, čar Dak Lak, knưng rup Awa Hô hŏng lĭng kahan răng mgang knông lăn dlăngjĕ giăm êdi. Đại úy Phạm Văn Thức, Khua hlăm Anôk bruă kđi čar kđông kahan răng mgang knông lăn Sê Rê Pôk brei thâo, leh 2 mlan ngă mkra, hdră anei dưi ba yua djŏ hŏng wưng bi hdơr 134 thŭn Hruê kkiêng khua gĭt gai Hồ Chí Minh, hĭn mơh lŏ tŭ yuôm.

 “Tơdah mâo hdră bruă hlăm Anôk bruă dhar kreh mơ̆ng êpul lŏ mâo sa hdră bruă bŏ hŏng klei yuôm bhăn, mâo boh tŭ yuôm êdi, amâo djŏ knŏng čiăng bi siam ƀiădah lŏ đru mjuăt bi hriăm knhuah gru kơ ênuk gưl knuă druh, lĭng kahan kđông kahan răng mgang knông lăn Sê Rê Pôk, sa gru kruăk yuôm bhăn mñă klă klei lŏ čuê lehanăn lŏ dơ̆ng mđĭ lar knhuah gru jhŏng ktang mơ̆ng êpul kahan răng mgang knông lăn”.

         Mơ̆ng thŭn 2019 truh kơ ară anei, phung êdam êra Dak Lak mtrŭt mjhar djăp klei găl mâo, bi hgŭm hŏng dŭm êpul mkra 4 knưng rup Awa Hô hŏng lĭng kahan răng mgang knông lăn, dưm ti wăl anôk kđông kahan răng mgang knông lăn hlăm čar. Ti gŭ rup mâo mkra 4 klei duê mơ̆ng Awa Hô mđup brei kơ kahan răng mgang knông lăn: “Lăn êa mtah mda čư̆ dliê prŏng kdrưh/Kriê kjăp ala čar amâo uêñ suaĭ êmăm/ Čư̆ dliê prŏng bruă mă lu mơh/ Êa êlam hĭn mơh ai tỉẻ drei êlam hĭn.

Kma asăp mtô mtă mơ̆ng Awa, dŭm ênuk gưl knuă druh, lĭng kahan răng mgang knông lăn ti Dak Lak gĭt hgao jih klei dleh dlan, čiăng bi leh jih bruă mâo kčah jao. Thượng úy Y Son Niê Êban, kđông kahan răng mgang knông lăn Yok Đôn, să krông Ana, kdriêk Ƀuôn Đon brei thâo:

 “Awa Hô mkŏ mjing êpul kahan răng mgang knông lăn, êlâo kơnăn jing êpul kahan djă phao ktuang yang ƀuôn. Awa pô mtam nao mkŏ mjing Sang hră ksiêm hriăm kơ bruă lĭng kahan răng mgang knông lăn. Klei anei mâo boh tŭ yuôm, mtă kơ jih jang knuă druh, lĭng kahan, phung đoàn viên gĭr hriăm mjuăt lehanăn hluê ngă djŏ si klei mĭn, knhuah mngač Hồ Chí Minh”.

          Hluê Đại úy Nguyễn Bá Giáp, Pô đru hdră mjuăt bi hriăm bruă kđi čar, lĭng kahan răng mgang knông lăn čar Dak Lak, rup Awa Hô jao sa kpăt lăn kơ lĭng kahan jing asăp mtă mtăn truh kơ phung kahan kahan răng mgang knông lăn thâo mpŭ, răng mgang kjăp krĭng knông lăn ala čar.

 “Anei jing sahlăm dŭm gru knăl lehanăn ăt jing klei bi mklă krĭng lăn yuôm bhăn mơ̆ng ala čar ti grăp krĭng lăn lehanăn mtă kơ jih jang knuă druh, lĭng kahan gĭr bi leh jih bruă klam mâo kčah jao, răng mgang kjăp krĭng lăn ala yuôm bhăn mơ̆ng Ala čar”.

          Hdră rup Awa Hô hŏng lĭng kahan răng mgang knông lăn ti dŭm kđông kahan răng mgang knông lăn jing boh tŭ kbiă hriê mơ̆ng klei hgŭm kngan mơ̆ng phung đoàn viên, êdam êra hlăm čar Dak Lak. Amai H’Giang Niê, Khua bruă Đoàn čar Dak Lak brei thâo, anei jing bruă ngă đru mjuăt bi hriăm knhuah gru kơ ênuk gưl hđeh.

“Hmei mkŏ mjing knưng rup Awa Hô hŏng phung kahan răng mgang knông lăn čiăng kơ phung đoàn viên, êdam êra tơdah nao ti krĭng knông lăn srăng mâo wưng čiăng hưn mthâo kơ krĭng knông lăn, hưn mthâo kơ klei mĭn, knhuah mngač Hồ Chí Minh, hưn mthâo kơ lĭng kahan răng mgang knông lăn lehanăn anei ăt jing boh kdrŭt mđĭ ai prŏng hŏng phung knuă druh, lĭng kahan tơdah mâo knưng rup Awa tinăn. Msĕ si Awa Hô ăt dôk tinei hŏng phung knuă druh, lĭng kahan răng mgang knông lăn”.

Knưng rup “Awa Hô hŏng lĭng kahan răng mgang knông lăn” jing leh ngăn hlăm ai tiê klei mĭn prŏng êdi mơ̆ng êpul, mâo boh tŭ yuôm jăk siam, bi êdah klă rup Awa Hô hŏng lĭng kahan răng mgang knông lăn, bi êdah klei mđing dlăng mơ̆ng Đảng, Awa Hô hŏng hdră răng mgang klei dưi kiă kriê kluôm ênŭm krĭng knông lăn ala čar lehanăn phung knuă druh, lĭng kahan răng mgang knông lăn. Knưng rup “Awa Hô hŏng lĭng kahan răng mgang knông lăn” ti krĭng knông čar Dak Lak đru leh kơ grăp čô knuă druh, lĭng kahan gĭr tui hriăm lehanăn hluê ngă gru mngač knhuah hdĭp Hồ Chí Minh, mđĭ lar knhuah gru aê ama nao êlâo čiăng răng mgang, mkŏ mkra lehanăn mđĭ kyar ƀuôn sang./.