VOV4.Êđê - Mđing truh kơ hdră “Phung mda asei tui hriăm leh anăn hlue ngă knhuah mngač Hồ Chí Minh”, ti grăp anôk bruă pô, phung êdam êra Dak Lak gĭr mjuăt bi hriăm asei pô leh anăn hriăm mơ̆ng Awa Hồ hlăm djăp bruă ngă grăp hruê.

Jing knuă druh bruă Đoàn êdam êra ti să krĭng taih kbưi, ayŏng Đỗ Hữu Phong, K’iăng khua bruă Đoàn să Čư̆ Pui, kdriêk Krông Bông, čar Dak Lak mđing uêñ nanao si srăng ngă čiăng bi leh bruă klam mâo kčah jao, bi mguôp, iêu jak phung êdam êra nao hgŭm mđĭ kyar bruă duh mkra, mkŏ mkra krĭng ƀuôn sang mrâo. Ayŏng Phong brei thâo: Ñu srăng gĭr hluê ngă knhuah mngač Awa Hô hlăm klei ba anăp, “Lač hrăm mbĭt hŏng ngă”. Kyua anăn, hlăm lu thŭn êgao, amâo djŏ knŏng hur har hlăm hdră Đoàn, ñu lŏ mđĭ kyar hdră duh mkra gŏ sang, rông ŭn mnŭ, pla lu mta ana boh kroh čiăng mđĭ hnư hrui wĭt. Yua klei thâo mơ̆ng pô čiăng mtô kơ phung đoàn viên mkăn, ñu ăt mđing kơ phung êdam êra dôk hlăm klei dleh dlan, gŏ sang knŭk kna dlăng ba, gŏ êsei ƀun, đru kơ hdră mnêč, mkăp prăk čan hŏng ênoh prăk mnga hdjul đru mđĭ kyar bruă duh mkra. Ayŏng Đỗ Hữu Phong yăl dliê:Kâo pô ăt kbiă hriê mơ̆ng hdră bruă Đoàn, mơ̆ng hdră mjuăt asei mlei snăn ăt mjing lu tač hlăp kơ phung đoàn viên, êdam êra ti alŭ wăl. Tal êlâo hĭn jing brei pô jing mnuih ba anăp hlăm hdră bi mlih mnơ̆ng pla čiăng mđĭ kyar bruă duh mkra kñăm brei kơ phung đoàn viên tui hriăm.

Bi hŏng amai Đỗ Thị Thanh Trang, aê mdrao mda asei dôk mă bruă ti Anôk bruă mdrao mgŭn kdriêk Čư̆ Mgar, hriăm lehanăn hluê ngă asăp Awa dưi ba yua nanao hlăm bruă grăp hruê. Hŏng ai tiê đua klam “Phung aê mdrao msĕ si amĭ ênang”, amai gĭr dlăng kriê klei suaih pral mnuih ruă. Amâo djŏ knŏng jih ai tiê kơ bruă, amai Trang lŏ hur har hlăm hdră kyua êpul êya. Ară anei, amai jing Khua bruă Đoàn ti anôk bruă mdrao mgŭn kdriêk, mnuih hgŭm hlăm Êpul phung aê mdrao mơ̆ng kdriêk. Khădah lu bruă, amai ăt kah mmông nao kơ anôk bruă nah gŭ ksiêm mkă, mbha êa drao kơ mnuih ƀuôn sang ti krĭng taih kbưi. Amai Đỗ Thị Thanh Trang yăl dliê:Kâo wĭt mă bruă ti anôk bruă mâo 10 thŭn, grăp thŭn Êpul hgŭm phung aê mdrao mda asei kdriêk Čư̆ Mgar kreh mkŏ mjing ƀiă êdi mơ̆ng 2 – 3 gưl nao ksiêm dlăng klei suaih pral êpul êya ti dŭm krĭng taih kbưi. Păt čiăng jih gưl anăn kâo nao s'aĭ. Kâo ktưn hưn êdi hlăk dưi mŭt hlăm anôk bruă mdrao mgŭn lehanăn bruă hriăm, hluê ngă gru mngač Khua gĭt gai Hồ Chí Minh mâo kâo ba yua nanao hlăm bruă mă grăp hruê êjai ksiêm mkă, dlăng kriê mnuih ruă ăt msĕ mơh hdră mjuăt bi hriăm, mđĭ klei thâo kơ bruă, si srăng ngă čiăng ba wĭt klei ư ai hlăm mnuih ƀuôn sang.

Hluê ngă Asăp mtrŭn mrô 05 mơ̆ng Phŭn bruă kđi čar kơ bruă mtrŭt mđĭ hdră tui hriăm, hluê ngă klei mĭn, knhuah mngač Hồ Chí Minh, wưng êgao, dŭm anôk bruă Đoàn ti Dak Lak pŏk ngă leh hŏng lu bruă klă sĭt. Dŭm hdră msĕ si “Ba anăp yan puih”, “Yan mnga ba anăp”, “Mlan êdam êra”, “Hdră êdam êra ba anăp yan mdei prŏng”, “Mđĭ ai nao sang hră”, “Phung êdam êra hluê gưt Asăp Awa, ba anăp kyua klei suaih pral êpul êya”, “Hruê m’ak kâo khăp kơ lăn čar kâo” dưi pŏk ngă tŭ dưn, krơ̆ng kjăp hlăm grăp thŭn mâo jak iêu lu phung đoàn viên, êdam êra nao hgŭm.

Bruă mtô mblang kơ hdră bruă dưi pŏk ngă ti lu anôk. Dŭm êpul mkŏ mjing leh lu klei bi lông tui ksiêm kơ gru mngač knhuah hdĭp, knhuah mă bruă Hồ Chí Minh. Dŭm “Huôm dưm hră čih kơ Awa Hô” dưi mkŏ mjing čiăng đru kơ phung đoàn viên, êdam êra lehanăn phung hđeh lŏ mâo hră m’ar tui ksiêm kơ klei hdĭp, bruă mă mơ̆ng Awa. Mơ̆ng anăn, mâo leh lu gru mngač êdah êdi hlăm bruă anei. Amai Phan Thị Trinh, K’iăng khua bruă Đoàn čar Dak Lak tĭng dlăng, mơ̆ng hdră anei, bruă hriăm lehanăn hluê ngă asăp Awa jing leh bruă ngă nanao, lar bra truh kơ phung đoàn viên, êdam êra hlăm čar.Bruă mkŏ mjing dŭm hdră bi lông mguôp hŏng bruă tui hriăm, hluê ngă klei mĭn, knhuah mngač Hồ Chí Minh čiăng pŏk ngă dŭm mta phŭn, hdră bruă krŭ kgŭ kdơ̆ng. Mâo lu boh phŭn, hdră ngă mâo lu phung ayŏng adei nao hgŭm, pŏk ngă tŭ dưn čiăng kơ dŭm hdră bruă Đoàn ƀrư̆ hruê ƀrư̆ đĭ kyar”.

Hŏng bruă mtô mblang nanao, hdră “Hriăm lehanăn hluê gưt Asăp Awa”, đru kơ lu phung đoàn viên, êdam êra, phung hđeh ti Dak Lak thâo săng hĭn kơ boh tŭ yuôm mơ̆ng klei mĭn, knhuah hdĭp, mă bruă Hồ Chí Minh. Mơ̆ng anăn mjing klei bi mlih hlăm hdră mjuăt mjing hlăm bruă tui hriăm, hluê ngă gru mngač Awa Hô hluê hŏng dŭm bruă ngă klă sĭt, tŭ dưn hlăm grăp hruê./.

   H’Xíu H’Mŏk/VOV TâyNguyên/ Pô mblang: H’Nêč Êñuôl