VOV4.Êđê - Hŏng klei gĭr ktưn, bi mdrŏng ti ƀuôn sang pô, lu hđeh êdam êra ti kdriêk ƀun ƀin Ƀuôn Đon, čar Dak Lak jhŏng tui duah êlan mrâo čiăng kčưm klei mă bruă knuă leh anăn bi đru hdơ̆ng pô đĭ kyar.

Lŏ wĭt hŏng bruă mă leh dŭm hruê mdei Têt Nhâm Dần, ayŏng Hồ Thế Mỹ, ti să Êa Ñuôl, kdriêk Ƀuôn Đon, čar Dak Lak dôk bi hgŭm hŏng dŭm anôk hrui blei, anôk čhĭ hliê čiăng pŏk mlar anôk hrui blei êbŭng prăng. Hlăm wưng anei, êbeh 10 ha êbŭng prăng mơ̆ng Anôk bruă mguôp hnư mnia mblei mnơ̆ng lŏ hma doh Việt Nguyên, mâo ayŏng Mỹ ngă pô phŭn lehanăn bi hgŭm hŏng ƀĭng ngă lŏ hma truh leh yan hrui êmiêt. Grăp hruê, sa ha mâo hrui êmiêt hlăm brô 100 kg truh kơ 150 kg êbŭng prăng mtah, hŏng ênoh čhĭ mơ̆ng 40 êbâo prăk/kg tui hluê.

Hưn lač kơ hdră mphŭn čô̆ kơ bruă, ayŏng Mỹ brei thâo, mơ̆ng knhal jih thŭn 2018, ayŏng mtrŭt gŏ sang lui hĕ 5 sao kphê, bi mlih ba pla êbŭng prăng. Pla êjai tui hriăm kơ hdră mnêč pla ti dŭm čar êjai, ayŏng mbĭt hŏng găp mkŏ mjing leh anôk bruă, bi mkŏ hgŭm hŏng anôk hrui blei. Ayŏng Hồ Thế Mỹ yăl dliê:Kâo tuôm hŏng lu blư̆ kruh rai, amâo tŭ jing kơ mjeh, kơ hdră mnêč pô nao truh ti anôk pla mjing prŏng čiăng tui hriăm. Dŭm krĭng lăn pla mjing mnơ̆ng pla sui thŭn, lăn sah kba snăn pô ba pla êbŭng prăng, lŏ mkra mđĭ lăn hŏng hdră dlăng kriê wiê ênăk kluôm hŏng hdră doh amâo ba yua hbâo ăngre ôh, snăn êbŭng prăng mphŭn đĭ jing jăk. Kâo mbĭt hŏng găp mphŭn čô̆ kơ bruă hŏng anôk bruă Việt Nguyên, đĭ kyar pral hĭn, bi lar bra gru hmô pla êbŭng prăng anei. Hưn mthâo truh kơ mnuih ƀuôn sang, ba jao kdrăp mrâo, đru kơ mjeh, hbâo pruê, hrăm mbĭt hŏng mnuih ƀuôn sang mđĭ kyar mnơ̆ng pla anei ti krĭng lăn Ƀuôn Đon”.

Čang hmăng dưi bi hgŭm đru mđĭ kyar bruă duh mkra, mlan 10 thŭn 2021, phung êdam êra mphŭn čô̆ kơ bruă ti Ƀuôn Đon, hluê hŏng êpul bruă Đoàn lehanăn Êpul bruă êdam êra kdriêk mkŏ mjing leh êpul hgŭm mphŭn čô̆ kơ bruă. Ayŏng Nguyễn Văn Hải, Khua êpul hgŭm brei thâo: hŏng mta kñăm đru kơ phung găp mphŭn čô̆ kơ bruă tŭ dưn, êpul hgŭm bruă dôk bi hgŭm hŏng lu anôk bruă djŏ tuôm mkăn, phung duh bi liê lehanăn mnuih mâo klei thâo čiăng lŏ đru, kčĕ brei kơ phung êdam êra.Grăp mlan srăng mâo sa hdră mnăm kphê mphŭn čô̆ kơ bruă, jak iêu phung hriăm lu lehanăn mnuih mă bruă start up nao bi trông čhai hŏng êpul êya mphŭn čô̆ kơ bruă. Bi tuôm, bi trông klei hâo hưn plah wah dŭm knơ̆ng, dhar bruă msĕ si anôk bruă lŏ hma, anôk bruă duh mkra kơ dŭm hdră mtrŭn mtrŭt mđĭ bruă ngă lŏ hma, hưn mthâo lar bra truh kơ phung êdam êra mphŭn čô̆ kơ bruă hlăm êpul êya. Nao dlăng dŭm gru hmô, bi hgŭm dŭm gru hmô hŏng anôk hrui blei lehanăn dŭm anôk bruă klei mrâo čiăng mtrŭt mđĭ anôk hrui blei mnơ̆ng dhơ̆ng kơ êpul êya mphŭn čô̆ kơ bruă.

Hluê si ayŏng Nguyễn Quang Trung, Khua bruă Đoàn kdriêk Ƀuôn Đon, mbĭt hŏng bruă mkŏ mjing êpul hgŭm mphŭn čô̆ kơ bruă čiăng mđĭ lar ai ktang lehanăn ai tiê jhŏng mĭn, jhŏng ngă mơ̆ng phung đoàn viên, êdam êra, hlăm wưng êgao, dŭm êpul bruă Đoàn, Hội ti kdriêk mkŏ mjing leh lu hdră bruă đru kơ phung êdam êra mphŭn čô̆ kơ bruă duh mkra, msĕ si: mkŏ mjing adŭ mjuăt bi hriăm, dŭm klei kƀĭn trông kơ hdră mphŭn čô̆ kơ bruă; bi hgŭm hŏng Knơ̆ng prăk đru ba yang ƀuôn kdriêk brei phung êdam êra mphŭn čô̆ kơ bruă, mkăp prăk kơ hdră mphŭn čô̆ kơ bruă... hŏng ênoh prăk êbeh 66 êklai prăk čiăng mđĭ kyar bruă duh mkra. Ayŏng Nguyễn Quang Trung lač snei:Hmei gĭr mjing ai tiê mphŭn čô̆ kơ bruă hlăm phung êdam êra, mjing klei găl kơ phung êdam êra dưi dưn dŭm phŭn prăk đru brei čiăng mđĭ kyar, mkŏ mjing dŭm klei bi kƀĭn trông čiăng kơ phung êdam êra dưi bi hgŭm mbĭt, ruh mtlaih klei dleh dlan hlăm bruă hluê ngă start up ti alŭ wăl pô. Kâo ăt čang hmăng dŭm gưl bruă Đảng, bruă sang čư̆ êa alŭ wăl mđing dlăng lu hĭn kơ hdră mphŭn čô̆ kơ bruă, boh nik hdră mphŭn čô̆ kơ bruă hlăm phung êdam êra ti alŭ wăl. Dŭm hdră mtrŭn, klei bhiăn mơ̆ng knŭk kna, mơ̆ng čar brei mđing klă nik hĭn kơ bruă anei, dưi hluê ngă hlăm wưng sui lehanăn mjing klei jăk găl hĭn kơ hdră mphŭn čô̆ kơ bruă ti alŭ wăl./.