Phung êdam êra ti 13 kđông kahan răng mgang knông lăn lehanăn dŭm êpul Tiểu đoàn Mjuăt bi hriăm – Bi kdơ̆ng mjêč, Êpul kahan hlăm Knơ̆ng gĭt gai lĭng kahan răng mgang knông lăn čar Dak Lak mkŏ mjing leh lu hdră đru kơ ala ƀuôn msĕ si nao čuă êmuh, mđup brei mnơ̆ng kơ gŏ sang dleh dlan, gŏ sang knŭk kna dlăng ba; jao prăk đru hriăm hră kơ phung hđeh ƀun, lŏ mkra dŭm hdră bruă yuôm bhăn ti alŭ wăl knông lăn. Klei êdah êdi mơ̆ng phung êdam êra lĭng kahan răng mgang knông lăn Dak Lak gưl anei jing hdră mtô mblang, hưn mthâo hdră bhiăn kơ klei dưi kiă kriê êa ksĭ, plao ksĭ, răng mgang klei êđăp ênang knông lăn mbĭt anăn bi mguôp hdră mtô mblang kơ klei ruah phung bi ala bruă kƀĭn ala gưl XVI lehanăn Êpul gơ̆ng bruă ƀuôn sang dŭm gưl 2026-2031, mđing kơ klei dưi, bruă klam mnuih ƀuôn sang hlăm hdră ruah khua. Mơ̆ng anăn, mđĭ klei thâo săng kơ bruă kđi čar, klei đua klam mơ̆ng phung đoàn viên, êdam êra, mnuih ti krĭng knông lăn hlăm bruă hluê ngă klei dưi bruă klam mnuih ƀuôn sang, đru mkŏ mkra ala čar kơ mnuih ƀuôn sang.

Ti să Ô Loan, Kđông kahan răng mgang knông lăn An Hải bi hgŭm hŏng Êpul êdam êra să jao leh 20 hnư mnơ̆ng kơ phung hđeh dleh dlan, kpưn đĭ hlăm klei hdĭp, ba yua hdră êdam êra “Guh mngač klei đru” kñăm lač jăk kơ phung aê ama nao êlâo mâo lu klei đru mguôp hlăm hdră răng mgang ala čar. Thượng uý Đỗ Ngọc Hoàng Sang, Kơiăng khua êpul mtrŭt mjhar mnuih ƀuôn sang, Kđông kahan răng mgang knông lăn An Hải, Knơ̆ng gĭt gai lĭng kahan răng mgang knông lăn čar Dak Lak brei thâo, dŭm hdră mlan 3 amâo djŏ knŏng mđĭ lar bruă klam ba akŏ mơ̆ng phung êdam êra hlăm hdră đru kơ ala ƀuôn ƀiădah lŏ đru mguôp yuôm bhăn hlăm hdră mtô mblang kơ bruă kđi čar, mkŏ mkra kjăp hdră mnuih ƀuôn sang răng mgang kjăp krĭng knông lăn.

 “Hluê hŏng hdră “Mlan êdam êra”, “Mlan 3 knông lăn” amâo djŏ knŏng đru kơ hdră bruă hlăm ala ƀuôn ƀiădah lŏ mđĭ hdră mtô mblang kơ hdră bhiăn, boh nik kơ klei dưi, bruă klam mơ̆ng mnuih ƀuôn sang hlăm hdră ruah phung bi ala bruă kƀĭn ala gưl XVI lehanăn Êpul gơ̆ng bruă ƀuôn sang dŭm gưl wưng thŭn 2026–2031. Mơ̆ng anăn đru kơ phung đoàn viên, êdam êra lehanăn mnuih ƀuôn sang krĭng knông lăn mđĭ klei thâo săng bruă kđi čar, hluê ngă djŏ klei dưi mơ̆ng pô, đru kơ hdră ruah khua dưi mkŏ mjing hŏng klei ngă phŭn mil pô, djŏ hdră bhiăn, êđăp ênang lehanăn tŭ jing…”/.