Hlăm klei bi trông, phung bi ala lač, kyua lu mta phŭn, bruă amâo mtăp mđơr êkei mniê ăt adôk mâo hlăm êpul êya, mjing klei kah mbha mniê êkei leh anăn jar kơ êkei mniê. Kyua anăn, hŏng klei thâo leh anăn boh sĭt dưi tŭ mă, phung êdam  êra, hlăm anăn phung êdam êra mnuih djuê ƀiă brei jing êpul ba anăp hlăm bruă hâo hưn, bi mlih klei thâo săng phung riêng gah kơ klei mĭn êkei mniê. Triệu Thị Nhung, djuê ana Dao, hriăm hlăm Sang hră gưl prŏng mtô jing nai - Sang hră gưl prŏng Đà Nẵng, brei thâo:

         “Ti alŭ wăl hmei ăt adôk mâo boh klei msĕ si phung mniê tơdah hriăm jih gưl dua leh anăn gưl tlâo jing dôk ti sang mă bruă amâodah nao dôk ung. Kyua phung khua thŭn bi mĭn phung mniê wăt tơdah hriăm lu snăn êdei anăp ătt dôk ung mơh snăn ăt kăn dưi đru mơh kơ sang pô. Kyua anăn phung amĭ ama khăng kpĭ anak pô brei dôk ung hnưm leh anăn mdei sang hră. Kâo bi mĭn krĭng pô phung êdam êra brei gĭr bi mĭn kơ pô čiăng bi mlih klei mĭn kthŭl mluk anăk”.

Phung bi ala lač, čiăng bi mlih klei mĭn kơ êkei mniê leh anăn jar kơ êkei mnia brei mâo klei bi mguôp lu mta, mơ̆ng bruă sang hră, hdră êlan truh kơ dhar kreh ala ƀuôn. Hlăm anăn brei mđĭ bruă mtô bi hriăm kơ klei mtăp mđơr êkei mniê hlăm sang hră, bi mguôp hlăm hdră mtô bi hriăm ăt msĕ mơh mtrŭt mjhar phung hriăm gưl prŏng hgŭm hlăm dŭm êpul hgŭm, bruă ngă ala ƀuôn. Mơ̆ng anăn mđĭ klei thâo čiăng msir mgaih bruă ngă ăt msĕ mơh klei hâo hưn hlăm pul êya. Hoàng Thị Hạnh, K’iăng khua hđăp, K’iăng Khua Dhar bruă djuê ana lač, phung êdam êra mnuih djuê ƀiă kơ krĭng mnuih djuê ƀiă, knhuah dhar kreh mnuih djuê ƀiă. Diñu srăng mâo hdră  djŏ guôp čiăng grăp knhuang msưh kdŭn, lăm lui klei mĭn kah mbha êkei mniê, jar êkei mniê.

          “Bruă klam yuôm bhăn tơdah phung êdam êra mkŏ mjing dŭm bruă ngă čiăng hâo hưn mtô mblang hŏng klei mmuñ ênhiang djuê ana; hŏng bruă ngă mơ̆ng êpul hgŭm, mkŏ mjing bruă mjĕ êrô plah wah êpul êya mơ̆ng djuê ana anei hŏng djuê ana mkăn hlăm mnuih djuê ƀiă; tui hriăm gru hmô jăk, hlăm anăn klei mĭn kah mbha êkei mniê leh anăn jar kơ êkei mniê dưi lăm lui amâodah grăp knhuang msưh kdŭn”.

 Blŭ hrăm mphŭn pŏk klei bi kƀĭn, K’iăng Khua Êpul hgŭm phung mniê Việt Nam Nguyễn Thị Thu Hiền brei thâo: Klei bi trông jing klei găl kơ phung bi ala, phung hriăm gưl prŏng, lač: Klei bi trông jing klei găl čiăng kơ phung bi ala, phung hriăm gưl prŏng, phung êdam êra bi trông, kah mbh, mđing hmư̆, čih yap klei hâo hưn čiăng êdi, yuôm bhăn kơ bruă knuă, kơ klei mđĭ kyar pô leh anăn klei čang hmăng đru mguôp kơ êpul êya. Hŏng Êpul hgŭm phung mniê Việt Nam leh anăn dŭm bruă djŏ tuôm, anei ăt jing klei găl čiăng ƀuh klă hĭn bruă klam phung êdam êra, phung hriăm gưl prŏng hlăm klei mđĭ lar bruă đru mguôp yuôm bhăn mơ̆ng êpul anei. Hlue si Nguyễn Thị Thu Hiền, bruă lăm lui klei mĭn kơ êkei mniê, brei mâo klei đru, mjing klei găl, mơ̆ng lu anôk bruă djŏ tuôm, mđĭ ai phung êdam êra ngă klei pô čang hmăng.

       “Čiăng snăk Phŭn bruă sang hră mtô bi hriăm srăng mđĭ bruă hâo hưn, mđĭ klei thâo săng, mkŏ mjing lu bruă hriăm mơ̆ng klei hiu čhưn dlăng čiăng mkăp klei thâo kơ klei mtăp mđơr êkei mniê kơ phung êdam êra, čiăng kơ êpul anei srăng klă sĭt jing êpul ba anăp hlăm bruă lăm lui klei mĭn kơ êkei mniê, jar mniê êkei, mđĭ klei mtăp mđơr êkei mniê”.

Klei bi trông dôk hlăm bruă ngă mơ̆ng Hdră hâo hưn mtô mblang mđĭ klei mtăp mđơr êkei mniê hŏng akŏ “Phung êdam êra mnuih djuê ƀiă ba anăp bi mlih klei mĭn êkei mniê kyua klei čang hmăng mđĭ kyar”. Hdră ngă bruă mkŏ mjing dôk hlăm jar Hdră bruă 8 “Hlue ngă klei mtăp mđơr êkei mniê leh anăn msir mgaih bruă mjêč hŏng phung mniê leh anăn hđeh điêt” hlăm hdră kñăm ala čar mđĭ kyar bruă duh mkra ala ƀuôn krĭng mnuih djuê ƀiă leh anăn krĭng čư̆ čhiăng wưng 2021 – 2030. Phung hđeh nao hlăm bruă anei jing phung ba anăp bi mlih klei mĭn mtăp mđơr êkei mniê, jar kơ êkei mniê hlăm gŏ sang leh anăn êpul êya, lăm lui klei mĭn kthŭl mluk amâo lŏ djŏ guôp, jing klei gun kpăk kơ klei pô đĭ kyar leh anăn êpul êya. Grăp čô srăng jing sa čô hâo hưn jih ai tiê, mâo lu klei mĭn mbruă, hdră ngă jăk hlăm klei hâo hưn mđĭ klei thâo săng kơ êkei mniê, klei mtăp mđơr êkei mniê hŏng ƀĭng găp, găp djuê hlăm gŏ sang leh anăn phung mda asei… đru mđĭ hĭn bruă mtăp mđơr êkei mniê hlăm krĭng mnuih djuê ƀiă leh anăn krĭng čư̆ čhiăng./.