VOV4.Êđê - Găn leh dŭm klei dleh dlan kyua klei ruă tưp Covid-19, phung đoàn viên hđeh êdam êra hlăm kluôm ala mkŏ mjing leh lu klei bi hmô hŏng klei mbruă, đru kơ mnuih ƀuôn sang mâo klei ruă tưp Covid-19 leh anăn êpul ba anăp gang mkhư̆ klei ruă tưp. Klei anăn bi êdah klei djŏ guôp, hŏng klei mbruă mơ̆ng phung hđeh êdam êra hlăm djăp mta bruă leh anăn jing bruă jăk êdah êdi. 

Mlan 5/2021, bruă êdam êra ba anăp dŭm čar kwar Dưr pŏk ngă leh lu hdră đru mguôp lehanăn mkăp mnơ̆ng dhơ̆ng, čhiăm guôm ƀô̆, êa rao bi mdjiê kman kơ dŭm čar Hà Nam, Vĩnh Phúc, ƀuôn prŏng Hà Nội. Hlăm anăn, đuôn truă gang ƀô̆ mâo leh phung đoàn viên, êdam êra mkra mjing, ba wĭt leh boh tŭ klă sĭt hlăm bruă bi hrŏ klei tưp lar mơ̆ng klei ruă tưp. Knŏng hlăm 3 hruê mă bruă, Đinh Thị Ngọc Thảo, mbĭt hŏng êpul ba anăp ti Wăl anôk dôk Pháp Vân, Hà Nội mkra leh 1000 boh đuôn truă gang ƀô̆ ba m’ĭt kơ anôk dôk bluh mâo klei ruă. “H’ô ao mtah ba anăp, êpul hmei hơ̆k m’ak êdi hlăk mâo Êpul bruă gưl dlông lehanăn dŭm êpul êya bruă jao ngă mkra mu truă guôm ƀô̆, hŏng klei čang hmăng dưi đru mguôp ai tiê pô hlăm hdră gang mkhư̆ klei ruă tưp”.

Hlăm wưng klei ruă Covid 19 bluh mâo dleh dưi ksiêm dlăng, phung êdam êra lŏ pŏk lu hdră mkra mnơ̆ng mrâo mkăn kñăm đru kơ mnuih ƀuôn sang djŏ klei ruă Covid 19 lehanăn êpul ba anăp hlăm hdră gang mkhư̆ klei ruă tưp. Anăn jing dŭm boh jhưng mkra hŏng m’ar Catong khăng mkăp kơ dŭm anôk bi ktlah mklin sa anôk; dŭm anôk mă mta ksiêm dlăng mâo kdrăp bi êđăp kơ phung mă bruă mdrao mgŭn amâo dah “Ao bi êđăp” dưi bi hrŏ klei hlơr kơ êpul mă mta ksiêm dlăng kman hlăm dŭm hruê adiê mđiă ktang... Dŭm mta mnơ̆ng mkra mrâo anei klă sĭt đru leh kơ êpul ba anăp hlăm hdră gang mkhư̆ klei ruă tưp.

Hlăk ênoh mnuih ruă F0 ti Hà Nội đĭ lu hlăm akŏ thŭn 2022, Êpul bruă êdam êra, Êpul hgŭm bruă Đoàn Hà Nội pŏk ngă leh gru hmô ATM oxy, ba oxy đru kơ mnuih ƀuôn sang F0 mdrao ti sang. Amai Nguyễn Thị Phương Dung, Khua bruă Đoàn alŭ Tây Hồ brei thâo: Gru hmô ATM oxy đru kơ mnuih ƀuôn sang h’ĭt ai tiê dôk mdrao ti sang, đru bi hrŏ klei ktrŏ kơ anôk bruă mdrao mgŭn: Êpul bruă Đoàn êdam êra ti krĭng mnuih ƀuôn sang dôk hluê ngă lu bruă klam đru kơ hdră gang mkhư̆ klei ruă tưp ti alŭ wăl. Phung êdam êra nao hgŭm hlăm dŭm êpul đru kơ phung F0, dŭ mdiăng oxy truh ti sang, bi hgŭm hŏng Êpul aê mdrao mda asei, Êlan đĭng blŭ 1022 đru kơ mnuih ruă dôk mdrao ti sang. Êngao anăn, mkŏ mjing lu êpul êdam êra đru kơ hdră tlŏ, dŭ mdiăng dŭm mta mnơ̆ng dhơ̆ng kơ mnuih ruă dôk mdrao ti sang.

Amâo djŏ knŏng hŏng klei mĭn mrâo hlăm hdră đru kơ mnuih ƀuôn sang F0 lehanăn êpul ba anăp hlăm hdră gang mkhư̆ klei ruă tưp, êbeh 2 thŭn êgao, dŭm êbâo čô êdam êra jing phung nai aê mdrao, phung sinh viên hlăm bruă mdrao mgŭn, phung kahan h’ô ao blouse kô̆ čŏng pô ba anăp nao ti dŭm anôk dôk bluh mâo klei ruă. Êbeh 2 mlan ba anăp mŭt hlăm ƀuôn prŏng Hồ Chí Minh mbĭt hŏng mnuih ruă mdrơ̆ng hŏng Covid 19, Thạc sỹ - Aê mdrao Đỗ Doãn Bách, Knơ̆ng ksiêm hriăm kơ Kboh, Sang êa drao Bạch Mai thâo săng dŭm klei čang hmăng mơ̆ng phung F0 dôk mdrao ti sang, hlăk anôk bruă mdrao mgŭn mâo lu đei mnuih. Aê mdrao Đỗ Doãn Bách mbĭt hŏng ƀĭng mă bruă mbĭt mkŏ mjing lehanăn ba yua “Anôk bruă phung nai aê mdrao hrăm mbĭt” kăp đru kčĕ kơ 150 êbâo čô ruă F0 dôk mdrao ti sang: Hlăm wưng kwar Dhŭng dôk mdrơ̆ng hŏng klei ruă, kâo čang hmăng dưi ba myơr, čang hmăng dưi đru kơ mnuih ƀuôn sang pô. Hlăm wưng anăn, hdră  hrăm mbĭt dưi mkŏ mjing, kâo tŭ mă lu blư̆ đĭng blŭ iêu mơ̆ng mnuih ƀuôn sang, kâo čang hmăng kâo pô dưi đru bi h’ĭt ai tiê, đru kčĕ kơ hdră mdrao mnuih ruă. Hlăm hdră phung nai aê mdrao hrăm mbĭt, kâo ăt mâo bruă klam kăp hrŏng ruah lehanăn mjuăt bi hriăm êpul nai aê mdrao đru kčĕ kơ mnuih ruă dôk mdrao ti sang. Ară anei, anôk bruă anei mâo leh hlăm brô 12 êbâo čô hgŭm jing phung mă bruă mdrao mgŭn.

Amâo djŏ knŏng hŏng klei mĭn mrâo čiăng dưi hdĭp hlăm wưng bluh mâo klei ruă tưp, thŭn 2021, phung êdam êra Việt Nam lŏ ba mdah 2,2 êklăk klei mĭn mrâo hluê hŏng dŭm hdră ngă, hlăm anăn êbeh 74 êbâo klei mĭn mrâo êpul bruă Đoàn dŭm gưl đru, hluê ngă bi sĭt. Hluê si Ngô Văn Cương, Khua bruă Đoàn êdam êra Cộng sản Hồ Chí Minh: Êpul bruă Đoàn mjing nanao tač hlăp, dŭm hdră ngă bruă čiăng kơ phung mda asei mâo klei găl mđĭ lar klei mĭn mrâo lehanăn đru kơ phung êdam êra hluê ngă klei mĭn anăn.

Bruă Đoàn gưl dlông mâo Mbah hâo hưn điện tử kluôm mơ̆ng jih jang klei mĭn mrâo mơ̆ng phung êdam êra hlăm kluôm ala. Leh kơnăn, hmei jao kơ dŭm bruă Đoàn čar, ƀuôn prŏng ksiêm dlăng dŭm klei mĭn anăn čiăng hluê ngă sĭt lehanăn bi đru, mjing djăp ai dưi, klei mâo, čih mkra hdră mtrŭn čiăng kơ phung êdam êra hluê ngă klei mĭn mrâo anăn.

Hŏng klei đru mơ̆ng êpul bruă Đoàn hlăm djăp mta bruă mdê mdê, phung êdam êra Việt Nam srăng mđĭ lar klei mĭn mrâo, klei čang hmăng ba myơr, đru mguôp ai ktang pô hlăm hdră mđĭ kyar lăn čar./.