Phung khua kiă kriê, lehanăn lu phung khua bruă Đảng, knŭk kna, bruă mặt trận čar kwar Việt Nam êlâo dih nao dưm leh kwang mnga bi hdơr kơ mnguh mngăt mgei ai tiê bi ktlah hŏng khua gĭt gai Đảng  Nguyễn Phú Trọng – Khua kiă kriê kdlưn hĭn, sa čô pô thâo bi hmô kơ klei hriăm lehanăn hlue ngă knhuah mngač Hồ Chí Minh, jing đảng viên cộng sản kjăp phĭt, mâo k’hưm prŏng mơ̆ng Đảng, knŭk kna lehanăn mnuih ƀuôn sang, bi êdah leh djăp ênŭm knhuah, klei mbruă, klei mĭn prŏng mơ̆ng khua kiă kriê Việt Nam ênuk mlih mrâo.

Hŏng klei ênguôt hnĭng prŏng, Khua lăn čar Tô Lâm čih hlăm hră čang ênuh: “Bŏ hŏng klei hnĭng ênguôt kơ Khua gĭt gai Đảng Nguyễn Phú Trọng – jing leh mnuih mâo phung ƀuôn sang Việt Nam khăp mpŭ, Jing khua kiă kriê suh sah, mnuih đảng viên cộng sản sĭt klă, mâo sa klei thâo bi hmnô mngač amâo mâo mdei tui hriăm lehanăn hlue ngă knhuah mngač Hồ Chí Minh, mâo k’hưm prŏng hŏng Đảng, Knŭk kna lehanăn mnuih ƀuôn sang kluôm ala, jing mah jiăng prŏng hŏng mnuih ƀuôn sang tar rŏng lăn; pô jih klei hdĭp ai tiê, klei thâo pô duh myơr kơ lăn čar, kơ Đảng, kơ mnuih ƀuôn sang, mâo leh lu klei duh myơr prŏng prĭn hlăm bruă cách mạng mơ̆ng Đảng lehanăn djuê ana, kơ bruă cộng sản hŏng ala tač êngao, lehanăn bruă răng mgang klei êđăp ênang, hơĭt kjăp, hmei ƀuăn srăng tui hriăm mơ̆ng ayang jih ai tiê duh myơr kơ lăn čar, mă bruă kơ mnuih ƀuôn sang gĭr ngă bi tŭ jing mta kñăm rŭ mdơ̆ng lăn čar Việt Nam êđăp ênang, hnŭk êngiê, hluh lir, mdrŏng sah kreh dhar, jăk mơak, tui si ayang duh myơr leh tui tiŏ leh hlăm klei săn asei mlei”.

Hlăm aguah anei 25/7, lu êpul bi ala mơ̆ng ala tač êngao, dŭm phŭn dharr bruă, dŭm čar, ƀuôn prŏng kluôm ala nao čang ênuh Khua gĭt gai Đảng Nguyễn Phú Trọng lehanăn bi juh găp djuê.