VOV4.Êđê- Hlăm klei nao čhưn lehanăn mă bruă ti Lao mơ̆ng Êpul Khua kiă kriê Sang phao kđi yang ƀuôn gưl dlông Việt Nam mơ̆ng hrue 9 – 13/8, hrue mbrue, Khua knơ̆ng kiă kriê sang phat kđi yang ƀuôn Gưl dlông Nguyễn Hoà Bình mbĭt hŏng êpul nao kkuh čhưn leh khua gĭt gai Đảng ala čar Lao Thongloun Sisoulith, lehanăn khua bruă kƀĭn ala Lao Saysomphone Phomvihane. Ti anôk drông, Khua knơ̆ng phat kđi gưl dlông hâo mdah hŏng khua gĭt gai Đảng, Khua lăn čar Lao Thongloun Sisoulith kơ boh tŭ dưn klei bi trông plah wah sang phat kđi gưl dlông Lao lehanăn sang phat kđi gưl dlông Việt Nam, boh tŭ dưn mkŏ mjing klei bi kƀĭn dŭm čar knông lăn 3 ala čar Lao – Việt Nam – Campuchia gưl tal 6 lehanăn kơ jih jang klei bi klă mbĭt čiăng mâo klei hgŭm 3 ala čar. Khua lăn čar Lao bi êdah klei mơak mâo drông leh êpul nao čuă lehanăn mă bruă ti ala čar Lao, lehanăn mñă, sang phat kđi Lao lehanăn Việt Nam năng mâo klei bi mguôp kjăp hĭn čiăng pral mghaih msir djăp mta boh klei, ba wĭt klei tŭ dưn kơ phung ƀuôn sang, lehanăn mâo klei đăo knang kơ knŭk kna, lehanăn mjing klei đăo knang mơ̆ng phung ƀuôn sang hŏng Đảng, knŭk kna./.

Pô mblang: Y-Khem Niê