Mơ̆ng 20 thŭn êlâo, dưn yua klei găl čư̆ dliê mơ̆ng gŏ sang leh anăn mnuih ƀuôn sang alŭ wăl, Hà Ngọc Hợp ti alŭ Lương Thịnh, să Tân thịnh, ƀuôn prŏng yên Bái rông leh kmruôt ti gŭ êyui dliê čiăng mă êa. Dŭm thŭn giăm anei, ƀuh klei čiăng ba yua êa kmruôt ƀrư̆ hruê ƀrư̆ đĭ mơ̆ng phung blei ba yua, Hà Ngọc Hợp mđĭ ênoh rông hluê si grăp thŭn. Truh kơ ară anei, gŏ sang ñu mâo êbeh 100 huôm rông kmruôt, wưng lu hĭn truh kơ 150 huôm, mâo hnư hrui wĭt dŭm êtuh êklăk prăk grăp thŭn.

Hà Ngọc Hợp brei thâo, bruă rông kmruôt amâo mâo guôn duh bi liê lu ôh, grăp huôm knŏng bi liê mă hlăm brô 1 êklăk prăk, ƀiădah čiăng kơ pô rông thâo mbruă, thâo klă klei mưng mơ̆ng kmruôt čiăng mâo hdră răng kriê djŏ guôp hluê si grăp wưng, grăp yan. Hĭn kơnăn, phung rông kmruôt čiăng thâo klă kơ dŭm mta mnga, yan mnga mblang, yan kmruôt nao mă êa mnga, krĭng mâo mnga…čiăng ba phung kmruôt nao ti anôk mâo lu mnga. Mbĭt hŏng anăn, ăt čiăng thâo klă kơ klei ngă hruh, mbha phung čiăng ñĕ kơ kmruôt phiơr đuĕ hĕ:

Rông hliê điêt giăm 20 thŭn hŏng anei ƀiădah yăl dliê kơ klei rông čiăng ngă bruă duh mkra mâo hlăm hŏng 7 thŭn gŏ sang ngă klei rông lu. Rông kmruôt pô srăng mâo klei mđing, srăng ksiêm dlăng jêñ jêñ kơh dưi rơ̆ng kjăp.

Wĭt mơ̆ng kdrăn blah krĭng Lăn Dăp Kngư thŭn 1976, kahan êka Nguyễn Minh Đông ti alŭ Hạnh Phúc, să Y Can, kdriêk Trấn Yên, čar Yên Bái ăt kčưm ngă bruă mđĭ kyar bruă duh mkra gŏ sang. Hlăm wưng anăn, klam ngă khua kiă kriê êpul mkra mjing mơ̆ng êpul hgŭm bruă, bi mdrơ̆ng hŏng klei klei ruă kyua klei hmăi mơ̆ng klei bi blah, Nguyễn Minh Đông mbĭt hŏng mô̆ gĭr tĭ mă bruă knuă čiăng rơ̆ng kơ klei hdĭp leh anăn rông ba anak čô.

Nguyễn Minh Đông brei thâo, hlăm brô 10 thŭn êlâo, êjai alŭ wăl mtrŭt mjhar mkŏ wĭt ana pla mjing, mnơ̆ng rông, gŏ sang ñu bi klă mlih 2ha lăn kbuôn čư̆ pla hbei ƀlang jing pla ana kđuč. Truh kơ ară anei, mơ̆ng klei hrui êmiêt, grăp thŭn gŏ sang hrui wĭt giăm 100 êklăk prăk. Nguyễn Minh Đông mâo nanao klei mĭn, jing sa čô lĭng kahan awa Hồ, grăp klei dleh dlan găn leh sơăi, ară anei hdĭp hlăm ênuk êđăp ênang, amâo mâo hŭi kơ klei ƀun ƀin, amâo mâo jing klei ktrŏ kơ gŏ sang leh anăn yang ƀuôn:

Kâo khăp kơ klei awa lač: “Kahan êka ƀiădah amâo mâo êwiên”, jing sa čô lĭng kahan grăp bruă ăt bi leh, ăt jhŏng ngă, jhŏng mĭn, amâo mâo huĭ kơ klei knap mñai, dleh dlan ăt dưi ngă jih, mđĭ ai mô̆ anak hrăm mbĭt mâo klei gĭr.

Ară anei Êpul lĭng kahan hđăp čar Yên Bái mâo êbeh 36.500 čô hgŭm, hgŭm ngă bruă ti êbeh 1.400 êpul. Čiăng bi lar bruă klam mơ̆ng lŏng kahan hđăp hlăm wưng mrâo. Êpul hgŭm lĭng kahan hđăp čar Yên Bái jêñ jêñ gĭ gai dŭm gưl bruă hluê ngă jăk dŭm hdră bi lông, bi ktưn, dŭm klei mtrŭt mjhar mơ̆ng alŭ wăl mkŏ mjing, mbĭt hŏng gưl bruă Đảng nah gŭ, bruă sang čư êa leh anăn dŭm gưl mnuih ƀuôn sang hluê ngă tŭ jing dŭm bruă klam kđi čar dưi jao.

Boh nik, Hdră bruă Lĭng kahan hđăp bi đru hdơ̆ng pô tliah ƀun, thâo ngă bruă duh mkra dưi mtrŭt mđĭ hŏng lu hdră ngă bruă hŏng klei mbruă, guôp găl, djŏ hŏng hdră kčah, hdră tă đĭ kyar bruă duh mkra ala ƀuôn mơ̆ng alŭ wăl leh anăn boh sĭt, klei găl mơ̆ng grăp čô hgŭm. Vũ Văn Huyên, k’iăng khua kiă kriê Êpul hgŭm lĭng kahan hđăp kdriêk Yên Bình, čar Yên Bái brei thâo, êngao kơ dưn yua dŭm ai dưi leh anăn hdră êlan đru mơ̆ng gưl dlông, mơ̆ng čar leh anăn alŭ wăl čiăng mkŏ mjing, mđĭ kyar klei bi hmô mkra mjing, mnia mblei djŏ guôp, Êpul ăt kreh bi mguôp hŏng dhar bruă djŏ tuôm mkŏ mjing dŭm adŭ hriăm kơ phung hgŭm kơ hdră pla mjing rông mnơ̆ng, hâo hưn, mtrŭt mjhar phung hgŭm dưn yua klei kreh knhâo hdră mnêč hlăm klei mkra mjing čiăng dưi mâo boh tŭ dưn msĕ hŏng klei hmăng hmưi:

Hmei mtrŭt mjhar phung lĭng kahan hđăp mđĭ kyar bruă duh mkra hŏng lu hdră êlan, gĭr ktưn bi mdrŏng. Hmei dưi rơ̆ng kơ êpul hgŭm bruă phung mnia mblei Lĭng kahan hđăp kdriêk, mđĭ ai diñu, anak čô diñu leh anăn mnuih ƀuôn sang mđĭ kyar bruă duh mkrta.

Hŏng klei mbruă, mâo mă lu klei tŭ jing hlăm mặt trận bruă duh mkra, phung lĭng kahan hđăp Yên Bái hruê anei dôk đru mguôp yuôm bhăn hlăm bruă bi hrŏ ƀun hŏng klei kjăp, mkŏ mkra krĭng ƀuôn sang mrâo leh anăn wăl krah mrâo mrang ti alŭ wăl, đru ba čar yên Bái đĭ kyar hmar, kjăp hŏng êlan mtah, bi kna, knhuah gru leh anăn yâo mơak./.