Êlâo kơ knăm mphŭn pŏk, Khua knŭk kna lehanăn kluôm anôk bi kƀĭn pioh leh sa mnĭt bi hdơr kơ mnuih ƀuôn sang djiê kyua klei yan adiê ngă; Êpul hgŭm phung mă bruă duh mkra mda asei Việt Nam mkăp leh 6 êklai prăk đru mjêč kơ 6 čar Cao Bằng, Hà Tĩnh, Đà Nẵng, Khánh Hoà, Gia Lai, Dak Lak msir mghaih klei truh jhat mơ̆ng yan adiê ngă. Êpul phung mă bruă duh mkra mda asei Việt Nam mâo hlăm brô 21.000 čô hgŭm hlăm dŭm anôk bruă duh mkra, mjing bruă mă kơ 5 êklăk čô mnuih, mâo ênoh hrui wĭt grăp thŭn êbeh 40 êklai USD lehanăn đru mguôp êbeh 10% GDP ala čar. Dŭm êtuh êklai prăk dưi mkăp kơ dŭm hdră đru kơ ala ƀuôn bi êdah ai tiê ba anăp kyua klei đua klam hŏng êpul êya mơ̆ng phung mă bruă duh mkra mda asei….

Hơêč hmưi kơ dŭm boh tŭ năng ktưn hưn mơ̆ng phung mă bruă duh mkra mda asei, mñă klă klei gĭr, klei đĭ jing, đĭ hriê kơ prŏng mơ̆ng phung mă bruă duh mkra mda asei Việt Nam, Khua knŭk kna mtă kơ Êpul phung mă bruă duh mkra mda asei Việt Nam lŏ dơ̆ng mĭn mrâo, pral kdal hĭn, bi mguôp lehanăn đru kơ phung mă bruă duh mkra mda asei mđĭ lar jih ai hlăk, klei thâo, klei khăp kơ ala čar, knhuah gru djuê ana, ba anăp hlăm hdră mphŭn čô̆ kơ bruă, bi mlih mrô, bi mlih mtah, ba yua klei thâo anak mnuih hlăm bruă pla mjing, mnia mblei; ba dŭm boh tŭ yuôm anăn knăl Việt, mnơ̆ng dhơ̆ng Việt kpưn đĭ hlăm tar rŏng lăn; mbĭt anăn ba anăp hlăm bruă hluê ngă klei đua klam hŏng ala ƀuôn. Ƀri gưl anei, Khua knŭk kna mtă kơ Êpul phung mă bruă duh mkra mda asei Việt Nam mtrŭt mjhar hdră bi ktưn 6 mrô sa, mâo: Ba anăp mrô sa, Mĭn mrâo mrô sa, jhŏng mrô sa, bi mguôp mrô sa, ñŭ kma mrô sa, thâo bi đru mrô sa./.