Tlam hruê 12/11, ti ƀuôn prŏng Pleiku, bruă Đảng čar Gia Lai lehanăn Sang hră ksiêm hriăm bruă kđi čar ala čar Hồ Chí Minh mkŏ mjing Klei bi kƀĭn trông kreh knhâo mđĭ kyar bruă tui ksiêm dhar kreh lehanăn hiu čhưn lăn mnga êa m’ak h’ĭt kjăp krĭng Lăn dap kngư hlăm wưng ară anei. Tinei, 50 klei čih mơ̆ng phung mă bruă ksiêm hriăm, phung kreh knhâo, phung kriê dlăng hdră hiu čhưn mâo leh klei đru mguôp kơ boh tŭ yuôm kơ hdră tui ksiêm lehanăn boh sĭt hdră hiu čhưn ti krĭng Lăn dap kngư.

Ti knăm anei, phung thơ̆ng kơ bruă, phung kreh knhâo bi trông leh kơ klei mĭn mđĭ kyar bruă hiu čhưn h’ĭt kjăp, klei găl mâo lehanăn klei ba yua djăp ai dưi, klei thâo kơ hdră bruă anei ti lăn dap kngư; Bi mklă mnơ̆ng lehanăn bi hgŭm mtrŭt mđĭ hdră hiu čhưn kñăm mđĭ kyar h’ĭt kjăp; Klei găl, klei lông dlăng lehanăn dŭm klei mâo mkăn lehanăn tă Hdră êlan, hdră msir mđĭ kyar bruă hiu čhưn ti krĭng Lăn dap kngư ară anei… Phung ksiêm hriăm, phung mă bruă kriê dlăng ăt đru mguôp lu klei blŭ kơ hdră mtô mblang, mđĭ klei thâo săng mơ̆ng mnuih ƀuôn sang kơ hdră mđĭ kyar bruă tui ksiêm kơ dhar kreh, hiu čhưn lăn mnga êa m’ak; bi leh hdră mtrŭn, mjing boh kdrŭt mđĭ lar bruă klam mơ̆ng êpul êya hlăm hdră bruă anei mguôp kjăp hŏng bruă kriê pioh, mđĭ lar boh tŭ yuôm dhar kreh djuê ana, mkŏ mkra krĭng ƀuôn sang mrâo./.