Hŏng akŏ “Phung êdam êra nao êlâo kyua klei hdĭp yang ƀuôn”, hdră mkŏ mjing hŏng lu mta bruă msĕ si: mkă dlăng, mbah êa drao amâo mâo mă prăk kơ mnuih ƀuôn sang ti ƀuôn Drang Phô̆k, să Krông Ana, mđup brei klei đru Anak rông kdông kahan knông lăn, mđup brei êdeh wai jơ̆ng kơ hđeh sang hră dleh dlan hriăm hră thâo, mđup brei ngăn prăk čô̆ kơ bruă kơ phung êdam êra, rŭ mjing sa boh sang klei khăp leh anăn 1 boh sang tlô kơ adei.

Mkŏ mjing knăm trŭn kơ bruă dŭm êpul êdam êra čŏng đru bruă “ƀom asăr mjeh”, mlih mrô leh anăn răng mgang klei êđăp ênang hlăm êlan klông. Đru mkăp brei ai dưi rŭ mjing knưng bi hdơr kơ Awa Hồ hŏng lĭng kahan knông lăn. Mbĭt hŏng anăn, hlăm wưng anei, Bruă đoàn čar Dak Lak mđup brei 20 hră ktrâo anôk “Ktưn hưn lăn čar” kơ dliê knŭk kna mkuôm Yŏk Đôn leh anăn dŭm kđông kahan knông lăn: Yŏk Đôn, Bo Heng leh anăn Sêrêpôč. Nao čuă, mđup brei hnư mnơ̆ng gŏ sang mâo lĭng kahan dôk ngă bruă klam ti knông lăn. Jih jang ênoh ngă hdră jing êbeh 400 êklăk prăk.