VOV4-Êđê- Mmăt hruê 24/7, êpul khua bruă hđeh êdam êra čar Kon Tum mkŏ mjing knăm čuh pui diăn bi hdơr kơ phung jhŏng ktang djiê êngiă. Anei jing sa hlăm dŭm bruă ngă mơ̆ng phung mda asei čar Kon Tum ƀri wưng bi hdơr 75 thŭn hruê kahan êka – djiê êngiă 27/7.

Knăm anei mâo êpul khua bruă êdam êra mkŏ mjing kdrưh k’ăm ti 2 anôk jing msat lĭng kahan djiê êngiă leh anăn sang msat bi hdơr phung êngiă asei Sư đoàn 10 ti ƀuôn prŏng Kon Tum. Mbĭt hŏng anăn ti 47 anôk čih yap ai đru phung lĭng kahan djiê êngiă ti 10 kdriêk, ƀuôn prŏng hlăm čar, dŭm êbâo čô hđeh êdam êra mơ̆ng 102 să, ƀuôn hgŭm, wăl krah ăt mkŏ mjing knăm myơr brui mngưi, kwang mnga leh anăn čuh êbeh 700 bĕ pui diăn bi êdah klei hdơr knga kơ phung lĭng kahan djiê êngiă, săn asei kyua klei êđăp ênang, klei êngiê ala čar.

Ară anei čar Kon Tum mâo êbeh 7.479 boh msat lĭng kahan djiê êngiă ti 10 bĭt msat lĭng kahan djiê êngiă hlăm čar. 5 thŭn êgao, dŭm anôk bruă djŏ tuôm hlăm čar ƀuh lêh 233 ktang phung lĭng kahan djiê êngiă. Kluôm čar ară anei mâo 49 anôk čih yap ai đru phung lĭng kahan djiê êngiă, hlăm anăn mâo 10 bĭt msat, 36 sang msat bi hdơr leh anăn 3 knưng bi hdơr phung lĭng kahan djiê êngiă.

Pô mblang: Y-Ƀel Êban