Hđeh sang hră Nguyễn Đức Danh (adŭ 12 A1, Sang hră gưl tlâo Lương Thế Vinh, kdriêk Kbang, čar Gia Lai) jing sa hlăm 8 čô mnuih ƀuôn sang mda asei ti čar Gia Lai thŭn 2023.  Hlăm sang hră, ñu mâo leh 4 hdră ksiêm hriăm kreh knhâo mâo sơăi klei pah mni. Hlăm anăn, hdră ba yua AI hlăm klei đru ktuê dlăng leh anăn kriê dlăng sang hră mâo klei pah mni mrô sa klei bi lông tin học čar Gia Lai tal XXII-2023, klei pah mni mrô dua tin học phung mda asei krĭng kwar Krah- Lăn Dap Kngư leh anăn pah mni mđĭ ai kluôm ala. Nguyễn Đức Danh ăt jing mta phŭn êdah êdi hlăm hdră tui hriăm leh anăn hlue ngă knhuah mngač Hồ Chí Minh čar Gia Lai:

 “Hŏng bruă klam ăt jing sa khua dlăng bruă êdam êra sang hră, ñu gĭr hgŭm hlăm dŭm hdră ngă bruă. Jing sa čô hđeh sang hră snăn hmei bi mklă bruă hriăm leh anăn boh tŭ hriăm hră jing bruă yuôm bhăn hĭn. Dưi mâo klei pah mni jăk hlăm klei hriăm hră mbĭt anăn jing anak jăk hriăm thâo Awa Hồ jing klei bi mklă yuôm bhăn hĭn čiăng kơ êdei anăp jing mnuih ƀuôn sang đru mkŏ mjing lăn čar”.

Ăt bŏ hŏng klei hur har duh myơr, amai Nguyễn Hoài Phương- Khua dlăng bruă êdam êra CS Hồ Chí Minh kdriêk Čư̆ Păh, čar Gia Lai hŏng phung êdam êrea alŭ wăl gĭr mkra mjing krĭng ƀuôn sang mrâo leh anăn klei hdĭp mda ala ƀuôn. Hlăm anăn, êdah êdi jing êlan phung êdam êra mâo êlan pui mtrang mngač leh anăn camera ti ƀuôn Phung, să Ia Mơ Nông. Mbĭt anăn 5 boh sang klei khăp leh anăn lu gru hmô duh ƀơ̆ng đru kơ phung hđeh êrĭt amĭ ama mnuih djuê ƀiă. Amai Nguyễn Hoài Phương brei thâo:

“Jing sa čô khua mniê bruă êdam êra, kâo hdơr nanao brei tui hriăm Awa Hồ mơ̆ng klei điêt hĭn. Hlăm wưng êgao, kâo hŏng phung êdam êra alŭ wăl hgŭm bi leh êbeh 550 kdrêč bruă, hdră bruă êdam êra, hŏng ênoh êbeh 8,5 êklai prăk. Hmei lač anăn jing wăl găl ênưih čiăng kơ phung mda asei dưi hriăm, duh myơr leh anăn hriê kơ prŏng.”

 Mơ̆ng thŭn 2021 truh ară anei, ti čar Gia Lai mâo 235 čô mda asei dưi bi mni jing phung êdam êra hlue ngă asăp Awa Mtô. Ayŏng Đỗ Đức Thanh-  K’iăng Khua dlăng bruă êdam êra CS Hồ Chí Minh čar Gia Lai brei thâo, hlăm dŭm gưl bi lông msĕ si: phung êdam êra ba anăp, phung mda asei mbruă, phung mda asei răng mgang čar kwar, phung êdam êra mphŭn čô̆ kơ bruă… lu phung êdam êra bi êdah klei duh myơr, ai tiê ba anăp mđĭ lar ai ktang hlăm klei hriăm hră, mă bruă, mđĭ kyar bruă duh mkra- ala ƀuôn.

“Bruă bi lar dŭm gru hmô êdah êdi, gru hmô, hdră ngă amâodah sa hlăm dŭm gru hmô jêñ jêñ. Hmei mâo hdră kčah thơ̆ng kơ bi lar gru hmô anei, boh nik mđĭ hlue ngă bruă tui hriăm knhuah mngač Hồ Chí Minh. Mơ̆ng anăn snăn ăt srăng mjing ai êwa bi hriăm mkŏ mjing phung mda asei bi hmô tŭ dưn kơ ala ƀuôn.”

Mơ̆ng boh sĭt bruă hâo hưn mtô mblang, mđĭ ktang tui hriăm leh anăn hlue ngă knhuah mngač Hồ Chí Minh kơ ênuk mda asei ti čar hlăm wưng êgao, Anôk dlăng bruă êdam êra čar Gia Lai bi mklă dŭm hdră msir kñăm mđĭ hnơ̆ng hriăm leh anăn tui hlue Awa hlăm wưng kơ anăp. Grăp thŭn mkŏ mjing hdră kčah hlue ngă akŏ mơ̆ng čar, mkŏ mjing gưl bi kƀĭn kđi čar hŏng akŏ “Hdơr kơ Awa - ai tiê drei mngač hĭn” hlăm gưl bi hdơr hruê kkiêng kơ Awa Hồ. Pŏk ngă hdră “kuč mngač klei čang hmăng phung mda asei”, mkŏ mjing klei hâo hưn bi mni phung êdam êra hlue ngă asăp Awa dŭm gưl, bi mni kơ phung êdam êra êdah êdi hlăm dŭm mta bruă. Mđĭ ktang hlue ngă klei mtrŭt mjhar “Grăp hruê sa klei hâo hưn jăk, grăp hruê kăm sa klei yăl dliê jăk” hlăm hla pŏk web, fanpage mơ̆ng dŭm gưl bruă êdam êra, Êpul hgŭm. Kƀĭn pŏk ngă Hdră kčah mơ̆ng Anôk dlăng bruă êdam êra čar kơ bruă bi lar gru hmô, klei yăl dliê jăk hlăm klei tui hriăm leh anăn hlue ngă knhuah mngač Hồ Chí Minh mơ̆ng hruê anei truh thŭn 2027./.