Hluê si klei hưn mơ̆ng bruă Êdam êra čar Dak Lak, hlăm 6 mlan akŏ thŭn anei, phung mda asei hlăm čar mkŏ mjing leh êbeh 4.000 bruă mkŏ mkra, hdră bruă phung êdam êra mâo ênoh êbeh 7 êklai 200 êklăk prăk.

Klă klơ̆ng, dŭm gưl bruă êdam êra hlăm čar rŭ mjing leh 17 boh sang klei khăp, sang čhiăm hrah, mdưm 17km klei pui kuič mngač êlan ƀuôn, 23 anôk hlăp lêñ kơ phung hđeh, đru brei lu hip hdruôm hră kơ phung hđeh, măl êa mil, mkra wĭt dŭm pluh boh sang dhar kreh, sang yang ƀuôn. Dŭm hdră “Čŏng ngă bruă knăm năm”, “Knăm kjuh mtah kluôm ala” dưi mkŏ mjing hrăm mbĭt, iêo jak lu phung đoàn viên, phung êdam êra nao hgŭm hŏng bruă răng mgang wăl hdĭp mda, bi mdrơ̆ng hŏng klei mlih yan adiê ti dŭm alŭ wăl. Dŭm gưl bruă êdam êra hlăm čar mđup brei êbeh 20 êbâo hnư mnơ̆ng, giăm 3.000 klei đru hriăm hră mơar, êdeh wai jơ̆ng kơ mnuih ƀuôn sang, kơ phung hdeh, mkŏ mjing hdră mkă dlăng, mdrao klei ruă amâo mâo mă prăk ti dŭm krĭng taih kbưi. Kluôm ênoh prăk đru ngă bruă jing êbeh 10.000 êklai prăk. Amai H’Giang Niê, Khua bruă êdam êra čar Dak Lak brei thâo.

“Êngao kơ klei mkŏ mjing hliê dŭm hdră bruă, plah wah dŭm gưl bruă êdam êra lŏ mâo klei bi mguôp. Bi hŏng gưl čar, hmei hnêč iêo mthưr klei uêñ mĭn mơ̆ng dŭm knơ̆ng bruă, êpul grŭp wĭt đru hlăm dŭm alŭ wăl ti krĭng Lăn Dap Kngư. Kyuanăn dŭm mta bruă ngă djŏ mta kñăm, kñăm kơ bruă mkŏ mkra krĭng ƀuôn sang mrâo, wăl krah mrâo mrang. Bi kơ dŭm mta bruă mkăn kñăm kơ klei mlih mrâo hdră ngă bruă čiăng dưi klă sĭt hĭn.”

            Ti čar Kon Tum, bi lar bruă klam nao êlâo, čŏng ngă bruă, klei thâo mbruă mơ̆ng phung êdam êra, mơ̆ng akŏ thŭn truh kơ ară anei phung êdam êra alŭ wăl hur har nao hgŭm hluê ngă dŭm mta bruă mkŏ mkra, hdră bruă êdam êra đru bi leh bruă klam kđi čar, bruă klam thơ̆ng kơ bruă leh anăn nao hgŭm mđĭ kyar bruă duh mkra ala ƀuôn. Ayŏng A Xây, k’iăng khua bruă êdam êra čar, khua kiă kriê êpul hgum bruă êdam êra čar Kon Tum brei thâo:

“Čiăng hluê ngă dŭm mta bruă mâo boh tŭ dưn hĭn, Êpul khua bruă êdam êra čar Kon Tum mâo leh klei ksiêm dlăng, bi klă dŭm mta bruă hlăm 3 mlan êdam êra. Mtô mjuăt dŭm hdră êlan, mta phŭn djŏ tuôm hŏng klei mlih mrô čiăng ba jao klei knhâo mrâo mrang kơ phung êdam êra, ƀoh nik jing krĭng taih kbưi, krĭng mnuih djuê ƀiă”.

        Bruă êdam êra čar Gia Lai ăt mrâo mkŏ mjing hdră ksiêm wĭt 3 thŭn mkŏ mjing leh anăn pŏk mlar klei bi hmô hlăm bruă êdam êra leh anăn hdră bruă êdam êra čar Gia Lai, pah mni phung êdam êra hluê ngă asăp Awa thŭn 2023. Tlâo thŭn êgao, dŭm gưl bruă êdam êra hlăm čar Gia Lai mâo leh klei mđing, mtrŭt mđĭ dŭm hdră êlan mtô mjuăt knhuah gru klei krŭ kdơ̆ng, klei khăp kơ ala čar, mtô mjuăt knhuah hdĭp, knuih kniêng dhar kreh kơ phung êdam êra. Bruă êdam êra čar Gia Lai hluê ngă leh hdră “Sa hruê sa klei hưn jăk, grăp hruê kăm sa klei yăl dliê siam” hlăm mbah hla pŏk yang ƀuôn, hmao ƀuh leh anăn pah mni 27 čô bi hmô mnuih jăk, bruă jăk hlăm phung êdam êra.

Hluê ngă asăp mtrŭn mrô 05 kơ bruă “Mtrŭt mđĭ klei hluê hriăm leh anăn tui ngă gru mngač Hồ Chí Minh”, êpul khua bruă êdam êra čar Gia Lai kñăm leh kơ bruă tui hriăm leh anăn hluê ngă gru mngač Hồ Chí Minh, dlăng anei jing bruă klam kñăm, kluôm hlăm djăp mta bruă mơ̆ng phung êdam êra. Hlăm klei ngă bruă, mâo leh lu phung mâo klei bi hmô bi êdah klei thâo, klei khăp, găn klei dleh dlan čô̆ kơ bruă, răng mgang klei êđăp ênang bruă kđi čar, kyua klei hdĭp êđăp ênang kơ mnuih ƀuôn sang, mkŏ mkra krĭng ƀuôn sang mrâo. Gĭr ktưn hlăm wưng kơ anăp lŏ dơ̆ng mtrŭt mđĭ dŭm hdră bruă khăp kơ ala čar, nao êlâo mđĭ kyar bruă duh mkra ala ƀuôn. Jing sa hlăm phung mâo klei pah mni êdam êra hluê ngă asăp Awa, leh anăn mâo mă hră pah mni mơ̆ng bruă sang čư êa čar Gia Lai, ayŏng Nay Wing, khua brư êdam êra kdriêk Čư̆ Sê brei thâo:

“ Hruê anei kâo myưng mơang êdi, hlăm wưng kơ anăp srăng mâo dŭm bruă klam kñăm, klă klơ̆ng truh kơ phung êdam êra čiăng rơ̆ng leh anăn bi lar dŭm boh tŭ dưn hĭn. Pô srăng jing mnuih ba anăp, nao êlâo hlăm djăp mta bruă čiăng ngă klei bi hmô kơ phung êdam êra mkăn. Mđĭ hĭn bruă hâo hưn, mtrŭt mjhar phung êdam êra kơ dŭm mta bruă msĕ si kah mbha klei bhiăn ala čar, klei êđăp ênang hlăm êlan klông, mkŏ mjing klei găl čiăng kơ phung êdam êra dưi lĭng čan, mghaih msir bruă mă, mđĭ hnư hrui wĭt čiăng rơ̆ng bi hơĭt klei hdĭp mda.”

            Čih yap klei đru mguôp mơ̆ng phung mda asei hlăm alŭ wăl, Khua bruă sang čư êa čar Gia Lai mđup brei leh hră pah mni kơ 6 êpul êya leh anăn 10 čô mâo bruă tŭ dưn hĭn hlăm bruă mkŏ mjing leh anăn pŏk mlar klei bi hmô hlăm bruă đoàn leh anăn hdră bruă êdam êra čar Gia Lai. Êpul khua bruă êdam êra čar Gia Lai ăt mđup brei 75 hdră pah mni êdam êra mrâo mrang hluê ngă asăp Awa thŭn 2023.