Ti să knông lăn Ia Pnôn (čar Gia Lai), Êpul gĭt gai lĭng kahan knông lăn čar mkŏ mjing hdră Mlan 3 knông êdam êra - mlan 3 knông lăn hŏng lu mta phŭn tŭ dưn msĕ si mđup brei hdră kuč mngač, mkŏ mjing anôk hlăl lêñ jăk kơ phung hđeh sang hră. Mta kñăm jing klei bi lông yuh tiêng liêng êa mah hŏng 20 klei êmuh, đru kơ phung hđeh sang hră gưl 1 leh anăn gưl 2 Lương Thế Vinh thâo klă hĭn kơ knông lăn ala čar, Hdră bhiăn knông lăn Việt Nam ăt msĕ mơh bruă klam mơ̆ng êpul lĭng kahan knông lăn. Hluê anăn, đru mđĭ klei thâo săng hdră bhiăn, bi mbŏ ai tiê khăp kơ lăn čar leh anăn leh anăn bruă klam hlăm bruă răng mgang klei dưi kiă kriê lăn čar mơ̆ng hlăk dôk ti sang hră. Hlăm hdră, anôk bruă mđup brei kơ mnuih ƀuôn sang ƀuôn Triêl sa hdră kuč mngač krĭng knông lăn mâo ênoh êbeh 75 êklăk prăk, mbĭt hŏng 50 hnư mnơ̆ng kơ hđeh sang hră mâo klei hdĭp dleh dlan. Adei Rơ Lan H’Hương, hđeh sang hră adŭ 9, sang hră gưl 1 leh anăn gưl dua Lương Thế Vinh brei thâo:

“Kâo hơ̆k mơak kyua dưi nao hgŭm hlăm hdră Mlan 3 êdam êra - mlan 3 knông lăn leh anăn dưi ksiêm hriăm kơ knông lăn ala čar leh anăn hdră bhiăn knông lăn Việt Nam. Kâo săng gĭr hriăm thâo čiăng bi êdah ai tiê khăp kơ lăn čar mơ̆ng phung mda asei hmei”.

Mbĭt hŏng anăn, ti Dak Lak, Lĭng kahan knông lăn mkŏ mjing klei blŭ hrăm hŏng akŏ “phung êdam êra knông lăn čar Dak Lak kjăp ai tiê hluê Đảng”, bi mguôp pah mni phung mda asei êdah êdi, hmăng hmưi thŭn 2025. Hlăm knăm, knuă druh, đoàn viên phung êdam êra myơr mnga ti knưng bi hdơr Awa Hồ hŏng lĭng kahan knông lăn, bi êdah klei hdơr kơ khua gĭt gai Hồ Chí Minh, mbĭt anăn mñă klă klei gĭr hluê ngă gru mngač ñu, bi lar knhuah gru êpul êya. Hlăm klei blŭ hrăm, phung bi ala bi trông lu klei hriăm, hdră ngă jăk, lŏ dơ̆ng bi lar bruă klam nao êlâo, mbruă mơ̆ng phung mda asei hlăm bruă klam kriê dlăng, răng mgang klei kiă kriê knông lăn. Wưng anei, anôk bruă bi mni 10 čô mda asei êdah êdi, 7 čô mda asei hmăng hmưi thŭn 2025, mbĭt anăn pah mni sa êpul bruă leh anăn 2 čô mâo boh tŭ dưn. Đại tá Đỗ Quang Thấm, khua bruă kđi čar Êpul gĭt gai lĭng kahan knông lăn čar Dak Lak mñă ktang:

“Boh sĭt bruă klam răng mgang klei dưi kiă kriê knông lăn ala čar čiăng kơ grăp čô knuă druh, lĭng kahan, boh nik jing phung êdam êra, čiăng lŏ dơ̆ng gĭr mjuăt bi hriăm đĭ hriê kơ prŏng. Mñă kơ gưl bruă đảng nah gŭ gĭt gai anôk bruă lŏ dơ̆ng gĭt gai mkŏ mjing klei găl čiăng kơ phung êdam êra dŭm hdră bruă êdam êra đĭ kyar ktang, klă sĭt jing wăl anôk yuôm bhăn čiăng lŏ dơ̆ng mjuăt bi hriăm phung mda asei mơ̆ng anôk bruă.”

Ară anei êpul bruă êdam êra lĭng kahan knông lăn čar Dak Lak mâo 19 êpul bruă nah gŭ. Phung mda asei hur har bi mguôp hŏng dŭm alŭ wăl ngă dŭm mta bruă bi hơĭt klei hdĭp yang ƀuôn, mkŏ mkra krĭng ƀuôn sang mrâo, đru kơ mnuih ƀuôn sang alŭ wăl knông lăn hŏng dŭm gru hmô msĕ si đru adei nao sang hră - anak rông kđông kahan knông lăn, nai grat mtah, ATM êa doh krĭng knông lăn, Pui mngač krĭng knông lăn…

Wưng anei, bruă êdam êra Dak Lak mkŏ mjing knăm bi hdơr 95 thŭn hruê mkŏ mjing êpul bruă êdam êra cộng sản Hồ Chí Minh hŏng akŏ Phung mda asei dŭm djuê ana Dak Lak - klei hmăng hmưi kpưn đĭ hŏng lăn čar, mbĭt anăn pah mni 56 čô êdah êdi wưng thŭn 2020 - 2025. Bi ala dŭm gưl knuă druh đoàn leh anăn phung hđeh nao mjĕ mjik hŏng akŏ “Phung mda asei dŭm djuê ana Dak Lak - klei hmăng hmưi kpưn đĭ hŏng lăn čar” đru bi lar ai tiê lŏ čuê knhuah gru, bi râo ai tiê bruă klam duh myơr. Wưng anei, Êpul kha bruă Đoàn čar mđup brei klei pah mni kơ 56 êpul, grăp čô êdah êdi, mđup brei klai pah mni Lý Tự Trọng thŭn 2026 kơ amai Lê Hiếu Vy, khua bruă êdam êra sang hră gưl 4 Ngô Gia Tự. Lương Minh Tùng,  khua bruă êdam êra čar Dak Lak mñă klă:

“Anei jing wưng bi kƀĭn kđi čar yuôm bhăn mơ̆ng êpul bruă êdam êra, čiăng kơ phung hđeh hluê ngă gru mngač phung ayŏng amai, ngă jăk bruă klam pô, gĭr ktưn mŭt đoàn, mbĭt anăn bi kjăp êpul bruă êdam êra, nao hgŭm mkŏ mjing Đảng, Bruă sang čư̆ êa ƀrư̆ hruê ƀrư̆ kjăp ktang.”

Dŭm mta bruă êdah êdi, klă klơ̆ng hlăm mlan êdam êra thŭn anei amâo djŏ knŏng bi êdah bruă klam nao êlâo mơ̆ng phung mda asei dŭm djuê ana Lăn Dap Kngư, ƀiădah lŏ ksul mbŭ klei mĭn cách mạng, ksul mbŭ ai tiê khăp kơ lăn čar, bruă klam hŏng yang ƀuôn, hrăm mbĭt mkŏ mjing leh anăn răng mgang klei dưi kiă kriê knông lăn hlăm boh sĭt mrâo.