Dua thŭn hŏng anei, bruă mnia blei kpiê čeh Êđê amai H’Trang Niê, ti ƀuôn Kna A, să Čư̆ M’Gar, kdriêk Čư̆ M’Gar, čar Dak Lak pŏk mlar, ênoh čeh kpiê čhĭ ƀrư̆ lu. Hlue si H’Trang, kyua yua hla pŏk web ala ƀuôn msĕ si Zalo, Facebook, hgŭm hlăm dŭm êpul mnia blei… đru ñu tuôm hŏng lu phung blei ênưih hĭn mkă hŏng hdră čhĭ msĕ si êlâo. Mbĭt anăn, ñu lŏ mâo Êpul hgŭm phung mniê alŭ wăl hưn mthâo hgŭm hlăm Êpul hgŭm phung mniê mphŭn čô̆ kơ bruă amâodah dŭm gưl hriăm mjuăt online. Knŏng hŏng đĭng blŭ thâo mĭn mkŏ Internet, ñu dưi hgŭm hriăm mjuăt ti sang. Ăt hlue si amai H’ Trang, mơ̆ng hruê hgŭm hlăm dŭm êpul, ñu thâo djăp ênŭm leh anăn pral pai mă boh phŭn bruă ngă kyua Êpul hgŭm phung mniê dŭm gưl pŏk ngă ti nah gŭ, bruă bi trông klei hâo hưn găl ênưih snăk.

"Kâo čiăng dưi hriăm leh anăn bi tuôm hŏng lu phung amai adei hlăm anei, thâo lu hĭn kơ bruă knuă, mnia blei, kah mbha kơ hdră kah mbha bruă gŏ sang leh anăn bruă ti êngao”.

Amâo djŏ knŏng amai adei hlăm êpul hgŭm ôh ƀiădah êpul knuă druh hlăm êpul hgŭm ăt găl ênưih tơdah yua hla pŏk web ala ƀuôn čiăng ngă bruă. Amai Nguyễn Thị Thanh Nga, Khua Êpul hgŭm phung mniê alŭ Đoàn Kết, să Ea Mdroh, kdriêk Čư̆ M’Gar brei thâo: Hrô kơ nao čhưn kơ grăp čô mnuih snăn ară anei, knŏng čiăng sa bruă ngă hlăm đĭng blŭ jing amai adei hlăm êpul hgŭm hmư̆ klei hâo hưn leh anăn pral lŏ wĭt lač, pŏk ngă.

"Ară anei mâo Zalo snăn gưl dlông jao hră mơar, hră jak amâodah bruă pô dưi mă rup leh anăn čih hlăm hla pŏk web pô čiăng hưn kơ phung amai adei čŏng bi trông. Leh anăn nao hlăm klei bi kƀĭn knŏng nao bi kƀĭn pral, bi hrŏ hruê mmông, dưi ƀiă luč hruê mmông amai adei.”

Ba yua kdrăp mrâo hâo hưn lŏ bi êdah hlăm bruă phung mniê dŭm gưl čar Dak Lak yua kdrăp mrâo kriê dlăng knuă druh, phung mniê kyua Êpul hgŭm phung mniê pŏk ngă mơ̆ng thŭn 2021. Amai Ngô Thị Kim Long, K’iăng Khua êpul hgŭm phung mniê să Čư̆ Dliê Mnông, kdriêk čư̆ Mgar brei thâo, hdră anei đru kơ amai adei ênưih ktuê dlăng, kriê dlăng bruă ngă mơ̆ng êbeh 1.700 čô ti ƀuôn sang amâo luč ôh lu hruê mmông kriê pioh, dlăng hlăm hră mơar.

"Kâo mâo Êpul hgŭm phung mniê kdriêk ktrâo lač yua hdră čih ênoh phung hlăm êpul hgŭm, ênoh gru hmô, bruă ngă, dŭm hdră đru kơ dŭm êpul hgŭm. Kâo ƀuh găl ênưih kyua hdră anei dưi mâo lu boh phŭn hlăm klei hlue ngă bruă klam êpul hgŭm leh anăn hdră bruă phung mniê, klă mngač.”

 Hdră mtrŭn klei bi kƀĭn tal 18, wưng 2021 - 2026 mơ̆ng Êpul hgŭm phung mniê čar Dak lak bi mklă: Ba yua kdrăp mrâo hâo hưn hlăm bruă ngă Êpul hgŭm jing 1 hlăm 2 hdră êdah êdi hlăm bruă ngă êpul hgŭm leh anăn hdră phung mniê. Hlue anăn, grăp thŭn Êpul hgŭm mkŏ mjing klei bi trông, pŏk adŭ hriăm mjuăt kơ phung knuă druh hlăm êpul hgŭm, mprăp klei thâo ba yua kdrăp mrâo hlăm klei mphŭn čô̆ kơ bruă, mkra mjing, mnia blei kơ phung mniê. Tô Thị Tâm, Khua Êpul hgŭm phung mniê čar Dak lak brei thâo: thŭn anei hŏng akŏ Mđĭ ba yua kdrăp mrâo hlăm bruă ngă Êpul hgŭm, dŭm gưl Êpul hgŭm srăng pŏk ngă klei mđing, hgŭm hlăm klei bi lông ba yua kdrăp mrâo hâo hưn. Mbĭt anăn kčĕ mprăp djăp măi tĭng mă bruă kơ Êpul hgŭm phung mniê nah gŭ leh anăn êpul bruă mđĭ klei thâo yua mrô kơ phung hlăm êpul hgŭm.

"Hmei iêô mkrum êbeh 30 boh măi tính leh. Hlăm wưng kơ anăp hmei lŏ dơ̆ng mtrŭt mjhar čiăng kơ jih jang anôk bruă nah gŭ dưi ngă bruă. Jih jang phung knuă druh hlăm êpul hgŭm leh anăn phung mniê thâo yua kdrăp mrâo hâo hưn, thâo kơ kdrăp mrâo hlăm ênuk mrâo mrang 4.0 ară anei.”

 Yua kdrăp mrâo hâo hưn đru mguôp bi mlih ktang hlăm bruă ngă dŭm gưl phung mniê ti Dak Lak. Mơ̆ng anăn mđĭ boh tŭ dŭm hdră, mđĭ phung amai adei mniê pral thâo yua kdrăp mrô, hgŭm jăk hlăm hdră mlih mrô ala čar./.