Sang dôk điêt mơ̆ng 3 čô amai adei Rah Lan H’Kưm ti ƀuôn Chuet Ngol, să Čư̆ Ă. Ƀuôn prŏng Pleiku, čar Gia Lai lŏ mâo klei hơ̆k mơak hĭn êjai phung amĭ, phung amai jing kahan ksiêm hlăm êpul phung mniê kahan ksiêm čar Gia Lai nao čuă leh anăn hlăp lêñ hŏng diñu. Amai khua mơ̆ng 2 čô adei điêt jing H’Kưm ară anei mrâo 15 thŭn brei thâo: amĭ leh anăn ama luč leh mâo hŏng anei 6 thŭn. Mơ̆ng anăn truh kơ ară anei, Êpul bruă phung mniê kahan ksiêm čar ngă bruă đru rông ba, mơ̆ng klei huă ƀơ̆ng, truh kơ klei hriăm hră mơar kơ 3 amai adei. Hmei mâo nanao phung amĭ, phung amai mđĭ ai, đru hlăm djăp mta bruă, brei čhŭm ao mrâo, brei hdruôm hră čih leh anăn dŭm mta mnơ̆ng yua. H’Kưm brei thâo:

         “Grăp hruê, tơdah mâo bruă srăng iêo phung amai đru brei. Phung amai mđĭ ai hmei amâo dưi kbiă sang hră, srăng bi mguôp, bi khăp. Kâo ăt ƀuh klei mdul ƀiă klei dleh dlan leh anăn mâo klei juh. Kâo ăt gĭr mâo klei gưt čiăng năng hŏng klei uêñ mĭn mơ̆ng phung amai”.

Amâo djŏ knŏng amai adei Rah Lan H’Kưm, ti čar Gia Lai lŏ mâo 31 čô hđeh êrĭt amĭ ama, lu jing mnuih djuê ƀiă mâo dŭm gưl bruă phung mniê kahan ksiêm čar Gia Lai đru rông ba. Hŏng ênoh prăk iêo mkrum mơ̆ng phung knuă druh, lĭng kahan hlăm anôk bruă leh anăn iêo mkrum mơ̆ng yang ƀuôn, phung mniê hgŭm rơ̆ng đru kơ grăp čô hđeh mơ̆ng 4 -5 êklăk prăk hlăm sa thŭn. Ênoh prăk anei srăng đru kơ phung hđeh êrĭt amĭ ama mâo thiăm klei găl čiăng hriăm hră mơar leh anăn blei yua dŭm mta mnơ̆ng čiăng êdi. Thượng tá Nguyễn Thị Ngọc Thúy- Êpul hgŭm phung mniê kahan ksiêm čar Gia Lai brei thâo, lu phung hđeh dưi đru rông ba, kriê dlăng, ară anei mâo klei thâo hlăm klei hriăm hră mơar, ƀrư̆ hruê ƀrư̆ bi mguôp hŏng phung amĭ đru rông ba:

 “Êngao kơ bruă uêñ mĭn êmuh hrăm kơ klei hriăm hră mơar, klei suaih pral phung hđeh, hlăm mmông wăn hmei nao čuă, brei diñu nao hlăp lêñ.  Kâo ăt ba diñu wĭt kơ sang kâo pô čiăng mâo klei mjĕ giăm hŏng anak mniê kâo. Dŭm klei hriăm hră mơar, djăp bruă diñu hưn, iêo đĭng blŭ leh anăn čiăng kơ amĭ đru brei. Anăn jing klei mơak êdi”.

Mbĭt hŏng klei uêñ mĭn mơ̆ng dŭm gưl bruă phung mniê, thŭn 2022, să Phú An, kdriêk Đăk Pơ mâo leh adŭ mtô boh hră kơ phung amai adei mniê djuê ana Bahnar. Kyuanăn, mơ̆ng klei amâo mâo thâo boh hră, ară anei lu phung amai adei thâo čih, thâo răk, thâo bi tĭng tla hlăm klei čhĭ mnia. Amai Bùi Thị Minh Dương- khua êpul hgŭm phung mniê să Phú An, kdriêk Đăk Pơ brei thâo, mơ̆ng boh tŭ dưn anei, klei bi hmô adŭ mtô boh hră dưi pŏk mlar tru kơ dŭm să mkăn. Thŭn anei, êpul hgŭm bruă phung mniê dŭm să Yang Bắc, Yang Hội ăt pŏk thiăm 2 adŭ mtô boh hră, iêo jak 160 čô amai adei nao hgŭm:

       “Phung amai adei adôk mâo klei bi kngar, klei hêñ, amâo mâo jhŏng răk huĭdah soh nao tlao mâodah brei wĭt čih kơ sang amâo mâo čih. Êmuh diñu diñu lač djă giê čih dleh hĭn djă wăng ngă hma. Êjai thâo čih boh hră tal êlâo jing boh kdrŭt brei diñu hur har hĭn. Truh kơ ară anei, phung amai adei thâo răk, thâo čih, dưi hriăm mbĭt hŏng phung anak leh anăn thâo dlăng hlăm internet čiăng yua hlăm bruă mkra mjing, bi hrŏ klei ƀin ƀin”.

Chăm H’Hồng- Khua êpul hgŭm bruă phung mnuê čar Gia Lai brei thâo, êngao kơ bruă đru rông ba phung hđeh êrĭt amĭ am leh anăn pŏk adŭ hriăm kơ phung amai adei mnuih djuê ƀiă, dŭm gưl bruă phung mniê hlăm čar lŏ mâo klei đru hriăm hră mơar kơ phung hđeh hriăm hră thâo, mâo klei gĭr, rŭ mjing sang dôk klei khăp, đru brei ngăn prăk kơ phung mniê, brei mjeh mnơ̆ng rông, ana pla mjing. Hluê anăn dŭm êbâo čô hđeh leh anăn phung mniê mâo klei đru:

   “Hlăm wưng kơ anăp, êpul hgŭm bruă phung mniê čar Gia Lai lŏ dơ̆ng bi lar dŭm boh tŭ dưn dưi mâo, gĭt gai dŭm gưl bruă hluê hriăm dŭm klei bi hmô ti alŭ wăl leh anăn kluôm čar dưn yua hlăm bruă mđĭ kyar klei hdĭp mda gŏ sang. Mbĭt anăn hluê ngă dŭm klei bi hmô, êpul bi mguôp leh anăn dŭm klei bi hmô iêo jak klei nao hgŭm, pah mni mđĭ ai grăp čô, klei bi hmô êdah êdi čiăng pŏk mlar truh kơ dŭm gưl bruă”.

        Hŏng klei khăp leh anăn dŭm mta bruă klă klơ̆ng, êpul bruă phung mniê dŭm gưl ti čar Gia Lai dôk đru kơ phung hđeh êrĭt amĭ ama leh anăn phung mniê mnuih djuê ƀiă bi mdul ƀiă klei dleh dlan, đru ngă bruă rơ̆ng hơĭt klei hdĭp yang ƀuôn ti alŭ wăl./.