Mbĭt hŏng bruă klam kriê dlăng, mtô bi hriăm phung khua kahan gĭt gai, gưl krah, gưl man dưn, gưl prŏng bruă lĭng kahan nah gŭ, mbŏ klei thâo răng mgang klei êđăo ênang kơ phung tal 2…, Sang hră ksiêm hriăm bruă lĭng kahan krĭng I dưi jao bruă klam bi hgŭm hŏng Sang hră kđi čar kriê dlăng adŭ mtô mjuăt man dưn phung knuă druh kđi čar gưl krah, êpul kahan, mtô bi hriăm wưng 1, khua kahan gưl êpul kahan gưl prŏng hlăm Sang hră mdrao hlue knhuah kahan. Tơdah nao hlăm gưl hriăm, phung hriăm dưi mđĭ klei thâo săng, ba yua klei tŭ dưn hlăm boh sĭt ti anôk bruă, alŭ wăl anôk mă bruă. Lý Ngọc Minh, Khua gĭt gai Anôk bruă gĭt gai lĭng kahan ƀuôn hgŭm Vĩnh Trại, ƀuôn prŏng Lạng Sơn dôk ktuê dlăng adŭ hriăm mlih gưl man dưn truh kơ gưl prŏng bruă lĭng kahan nah gŭ, brei thâo:

 “Tơdah dưi mtô thiăm klei thâo mrâo mơ̆ng phung nai kâo ƀuh jăk snăk, mprăp kơ phung knuă druh klei thâo mă bruă kreh knhâo. Kơ klei ba yua hlăm bruă knuă tŭ dưn hĭn kơ êlâo kâo nao sang hră”.

Čiăng mđĭ boh tŭ bruă mtô bi hriăm, Khua Sang hră ksiêm hriăm bruă lĭng kahan krĭng I pŏk ngă leh lu hdră bi lông “Bi hgŭm, bi hmô, kjăp, mbruă, tŭ dưi”, “Bi hgŭm jăk, knhuah hdĭp djŏ, bi lông ktưn mâo klei tŭ dưi”.. Mơ̆ng anăn mjing klei lar bra, mđĭ ai phung knuă druh, nai mtô, phung hriăm bi mguôp, mbruă, mlih mrâo, lu hdră ngă mbruă dưi mđĭ lar. Hlăm  klei bi lông phung knuăd ruh kriê dlăng mtô mjuăt mbruă, nai mtô êdah êdi thŭn 2023 sang hră mâo 57 čô nai mtô êdah êdi gưl anôk bruă, 31 čô knyă druh kriê dlăng mbruă gưl tiểu đoàn, 44 čô êdah êdi gưl sang hră. Hlăm thŭn êgao, sang hră tŭ mă 1 klei ksiêm hriăm, 2 klei miư̆n mbruă kơ klei mkra mđĭ hdră mnêč, 3 hră mơar ksiêm dlăng gưl dhar bruă, 1 klei ksiêm hriăm, 1 klei mĭn mbruă gưl Êpul kahan; 4 klei mĭn mkra mđĭ hdră mnêč gưl sang hră leh anăn mâo Êpul kahan akâo brei klei pah mni 1 klei mĭn bruă gưl Phŭn bruă lĭng kahan. Thiếu tá Phạm Tuấn Việt, nai mtô kơ kdrăp lĭng kahan, Sang hră lĭng kahan Wăl kahan 1 hŏng klei ksiêm hriăm kơ kdrăp bi kna mgăn kơ boh knong, brei thâo:

 “Akŏ anei srăng msir mgaih jih jang klei êdu kƀah. Tơdah ka mâo kdrăp bi kna mgăn lĭng kahan mă wăng čiăng klei ti jơ̆ng čiăng dưi bi kna dưm mgăn. Tơdah tuôm hŏng lăn êun amâodah khăng ăt dleh dlan, wưng mâo klei bi kna luč 2 mnĭt. Tơdah yua akŏ kơ mnĭt mmông knŏng luč mơ̆ng 10-15 sê kông.”

Čiăng dưi ngă djŏ bruă mtô bi hriăm kơ bruă Đảng, kđi čar hlăm boh klei mrâo, Sang hră ksiêm hriăm bruă lĭng kahan krĭng I mkŏ mjing dŭm hră mtô bi hriăm, hră mtô ktuê dlăng hlue si hră mơar ktrâo lač, hlue ngă klei mtô mjuăt ngă djŏ klei čiăng mrâo. Đại tá Dương Xuân Thủy, Khua Anôk hriăm kơ Khoa học xã hội leh anăn Nhân văn, Sang hră ksiêm hriăm bruă lĭng kahan krĭng I , brei thâo:

 “Sang hră mtô kơ bruă Đảng bruă kđi čar mguôp hŏng bruă hlue ngă boh sĭt, anei jing dŭm mta phung hriăm êdei anei srăng ngă, mprăp klei thâo kơ diñu. Klei hriăm anei leh hriăm diñu hlŏng ba yua mtam. Sitôhmô jing ngă bruă kđi čar, khua dlăng bruă Đảng, khua bruă êdam êra hmei srăng mprăp klei thâo, boh sĭt diñu ngă, msĕ si hdră msir mkŏ mjing klei bi kƀĭn bruă Đảng, mkŏ mjing klei bi kƀĭn phung êdam êra, amâodah klei thâo kơ bruă hâo hưn mtô mblang snăn hmei bi mklă mơ̆ng boh sĭt mguôp hŏng diñu čiăng dưi ngă”

 Hlue ngă Hdră mtrŭn 1657 mơ̆ng Bruă Đảng kahan gưl dlông, Hdră mtrŭn mrô 20 mơ̆ng bruă Đảng kahan kơ klei mlih mrâo bruă mtô bi hriăm ngă djŏ bruă klam mkŏ mjing lĭng kahan hlăm boh klei mrâo leh anăn mđĭ hnơ̆ng mtô bi hriăm, Sang hră ksiêm hriăm bruă lĭng kahan krĭng I hlue ngă leh lu hdră msir jăk čiăng bi leh bruă klam dưi jao hŏng hdră mkŏ mjing sang hră kjăp ktang kluôm “bi hmô, êdah êdi” đru hlăm klei mkŏ mjing leh anăn răng mgang čar kwar Việt Nam ala ƀuôn ngă phŭn hlăm boh klei mrâo. Đại tá Đào Văn Minh, K’iăng Khua Sang hră ksiêm hriăm bruă lĭng kahan krĭng I, brei thâo:

 “Hlăm hdră mtô bi hriăm amâo djŏ knŏng kơ klei thâo ôh ƀiădah wăt  knuih kniêng anak mnuih. Grăp thŭn hmei nao ktuê dlăng hnơ̆ng thâo phung leh ruĕe hriăm, mtô kơ phung khua êpul kahan 3-5 mlan ruĕ hriăm snăn knuih mă bruă jăk hĭn kơ phung amâo hriăm. Phung khua kahan mkăp mơ̆ng dŭm anôk bruă Đảng leh dưi hriăm ti sang hră wĭt mă bruă mơ̆ng gưl kdriêk kơ dlông snăn mâo knuih mă bruă jăk hĭn.”

 Hlăm ai êwa bi lông kkuh drông hruê bi hdơr knhuah hruê êpul lĭng kahan wăl krah 1, bi hdơr, 80 thŭn hruê mkŏ mjing Êpul lĭng kahan yang ƀuôn Việt Nam mđĭ lar boh tŭ dưi mâo, bruă Đảng, Khua Sang hră ksiêm hriăm bruă lĭng kahan krĭng I lŏ dơ̆ng mđĭ ktang dŭm hdră bi lông ktưn mđĭ boh tŭ mă bruă mtô bi hriăm, mđĭ lar knhuah gru khăp kơ ala čar, klei mĭn čŏng gĭr, hur har duh myơr, bi leh jăk bruă klam arăng jao./.