Ti anôk bi kƀĭn phung čih klei mrâo grăp wưng mơ̆ng Phŭn bruă hŏng tač êngao mkŏ mjing tlam hruê 29/2 ti Hà Nội, wĭt lač klei êmuh djŏ tuôm mơ̆ng Việt Nam ti anăp China ba hô̆ mran ksiêm dlăng êa ksĭ nao ngă bruă ti Plao ksĭ Tư Chính hlăm krĭng lăn Việt Nam, Pô blŭ bi ala Phŭn bruă hŏng tač êngao Phạm Thu Hằng lač klă: Klei mĭn mơ̆ng Việt Nam hŏng plao kngăm Tư Chính jing klei mâo bi mklă lu blư̆ leh.  

Hluê anăn, Plao kngăm Tư Chính jing sa kdrêč mơ̆ng krĭng lăn ala čar Việt Nam lehanăn dưi bi mklă djŏ hŏng Klei kuôl kă Hdră bhiăn Êa ksĭ mơ̆ng Êpul hgŭm lu ala čar thŭn 1982. Việt Nam bi kdơ̆ng hŏng djăp bruă ngă soh hŏng klei dưi kiă kriê krĭng lăn mdê bi ala čar, mbĭt anăn mñă klă klei dưi bi kdơ̆ng mơ̆ng Việt Nam mâo bi mklă djŏ guôp hŏng hdră bhiăn tar rŏng lăn, boh nik Klei kuôl kă Hdră bhiăn Êa ksĭ mơ̆ng Êpul hgŭm lu ala čar thŭn 1982. Việt Nam srăng gĭr răng mgang kjăp klei tŭ dưi djŏ hdră bhiăn ti krĭng êa ksĭ mơ̆ng pô hluê hdră êđăp ênang djŏ guôp hŏng hdră bhiăn tar rŏng lăn./.