Tlam 30/10, Keh gang mkhư̆ klei ruă êka Asi (Keh AIP) bi hgŭm hŏng Dhar bruă răng mgang klei êđăp ênang êlan klông čar Gia Lai mkŏ mjing leh Klei bi kƀĭn ksiêm wĭt 5 thŭn hluê ngă Hdră “Bi hrŏ hnơ̆ng êran êdeh – Sang hră êđăp ênang” ti ƀuôn prŏng Pleiku. Klei bi kƀĭn tĭng dlăng, leh 5 thŭn pŏk ngă hdră anei, ƀuôn prŏng Pleiku klă sĭt jing ƀuôn prŏng ênuk mrâo kơ krĭng sang hră êđăp ênang ti čar lehanăn krĭng Lăn dap kngư.

 Hluê si klei tĭng dlăng mơ̆ng Knơ̆ng bruă Êlan klông – dŭ mdiăng Gia Lai, leh 5 thŭn pŏk ngă, ti ƀuôn prŏng Pleiku mâo leh 33 sang hră gưl 1 dưi mkra ping êlan êbat jơ̆ng, krĭng dôk guôn drông hđeh wĭt sang hră rơ̆ng klei êđăp ênang; hnơ̆ng êdeh êran tơdah găn sang hră hlăm krĭng ƀuôn prŏng 30km/h lehanăn êngao ƀuôn prŏng 40km/h. Hlăm ênoh anăn, 71% dưi bi mklă ti hnơ̆ng 5 mtŭ. Hdră anei đru bi hrŏ ênoh mnuih ruă êka lehanăn ênoh klei truh hlăm êlan klông ti krĭng sang hră. Ară anei, čar mâo leh hdră kčah mkra 56 boh sang hră ti dŭm ktuê êlan hlăm wưng ti anăp lehanăn mđing truh kơ gru hmô anei hlăm kluôm čar, boh nik ti dŭm să krĭng taih kbưi./.