VOV4.Êđê - Hruê 11/3/2022, Sang mđung asăp blŭ Việt Nam ti krĭng Lăn dap kngư mbĭt hŏng anôk bruă sang čư̆ êa alŭ wăl lehanăn gŏ sang, găp djuê, ƀĭng găp, ƀĭng mă bruă mbĭt nao ba leh asei atâo Pô mă bruă klei mrâo Kpă Si Mon, K’iăng khua hđăp Sang mđung asăp blŭ Việt Nam ti Lăn dap kngư wĭt leh hŏng aê aduôn atâo atiêt ti să Čư̆ Mô̆, kdriêk Ia Pa, čar Gia Lai. Hlăk 3h 20 mnĭt, tlam hruê 9/3/2022, Pô mă bruă klei mrâo Kpă Si Mon, K’iăng khua hđăp Sang mđung asăp blŭ Việt Nam ti Lăn dap kngư, kyua klei ruă ktrŏ đuê̆ wĭt leh hŏng aê aduôn atâo atiêt.

Knăm čang ênuh Kpă Si Mon

Ñu kkiêng hruê 3/8/1959, hdĭp jŏk 63 thŭn, mâo 25 thŭn mă bruă hdră mđung asăp 6 klei blŭ mnuih djuê ana ƀiă lăn dap kngư ti Anôk bruă mđung asăp blŭ Việt Nam krĭng Lăn dap kngư, mơ̆ng bruă mblang, mđung asăp klei Jarai truh kơ mă bruă kiă kriê. Hŏng ayŏng adei mă bruă mbĭt, Kpă Si Mon jing mnuih jĕ giăm, mhač, jing gru mngač kơ klei khăp m’ai, jih ai tiê kơ bruă, khăp kơ knhuah dhar kreh dŭm djuê ana Lăn dap kngư, gĭr djă pioh klei blŭ, boh hră truh kơ dŭm ênhiang mmuñ jăk jĭn, êdu ê’un. Hŏng hdră mđung asăp dŭm klei blŭ mnuih djuê ƀiă lăn dap kngư, ayŏng mđing uêñ, ksiêm dlăng bi nik grăp boh hră, ruah bi nik grăp klei mmuñ. Hŏng ƀĭng hmư̆ hdră mđung jĕ giăm taih kbưi, Kpă Si Mon jing anăn juăt mưng leh hŏng ƀĭng hmư̆ hdră mđung ti Lăn dap kngư, kruăk knăl dŭm thŭn êngŭn mlan hŏng đŏk êdu ê’un, kraih bi êdah lu klei hâo hưn hlăm hdră mđung asăp.

Gŏ sang, găp djuê lehanăn ƀĭng găp mă bruă mbĭt atăt ba asei atâo wĭt mdei ti ƀuôn sang Čư̆ Mô̆, kdriêk Ia Pa, čar Gia Lai

Đuê̆ wĭt hŏng aê aduôn atâo atiêt leh lu thŭn mlan siă suôr dôk hdĭp, mă bruă ti Ƀuôn Ama Thuôt, čar Dak Lak, ayŏng dưi ba wĭt leh ti krĭng lăn amĭ ba ama ƀă ti gŭ jơ̆ng Čư̆ Mô̆, kdrŭn Mộng mơ̆ng Krông Pa, hlăm kdriêk Ia Pa, čar Gia Lai./.

 H’Nêč pô mblang