VOV4.Êđê- Hrue 19/5, ti ƀuôn prŏng Pleiku mkŏ mjing klei rang mdah “Dŭm boh tŭ dưn kơ bruă kđĭ čar, bruă duh mkra, bruă dhar kreh čar Gialai”. Klei rang mdah pŏk hrue kăm dŭm bruă kkuh mơak 90 thŭn hrue mkŏ mjing čar Gialai, mâo mkŏ mjing mơ̆ng ară anei truh jih hrue 25/5. Hŏng 240 pŏk rup, hră mơar, hră kak rup lăn mâo rang mdah hlăm wăl sang kriê pioh ngăn drăp čar Gialai, klei rang mdah anei mdidng hlăm 4 mta bruă phŭn jing: Knhuah gru anôk ksiêm duah mnơ̆ng kdrăp đưm Rộc Tưng – Gò Đá, knhuah gru Tây Sơn Thượng Đạo, knhuah gru lăn mnga êa siam Dap Kngư Kon Hà Nừng, lehanăn dŭm boh tŭ dưn bruă duh mkra, ala ƀuôn dhar kreh čar Gialai hlăm dăl 90 thŭn mkŏ mjing lehanăn đĭ kyar.

Hlăm anăn, năng mđin hĭn jing lu rup lehanăn hră mơar lač kơ anôk phŭn krŭ kdơ̆ng K 10, lehanăn dŭm klei dưi hlăm klei bi blah mơ̆ng lĭng kahan lehanăn phung ƀuôn sang Gialai hlăm klei bi blah hŏng Mi lehanăn klei hdĭp phung ƀuôn sang Gialai hlăm dŭm thŭn leh mâo klei êngiê thŭn 1975./.

Pô mblang: Y-Khem Niê