Mbĭt hŏng Khua gĭt gai dŭm phŭn, dhar bruă leh anăn 2 čar Dak lak, Khánh Hòa, lu mnuih ƀuôn sang ti să krĭng Čư̆ Drăm, kdriê Krông Bông leh anăn Čư̆ San, čar Dak lak ăt nao dlăng mnĭt mnông mphŭn kčưm hdră bruă yuôm bhăn. Ayŏng, Trần Hưũ Thới, ti să Čư̆ Drăm, kdriêk Krông Bông, čar Dak Lak, brei thâo:

“Kâo ƀuh jăk snăk. Hdră bruă anei jing phŭn. Sa klei dơ̆ng jing bi hrŏ hruê mmông jă snăk, leh anăn năng ai kơ anăp srăng mđĭ kyar bruă duh mkra ktang snăk”

 Hdră bruă duh bi liê rŭ mdơ̆ng êlan dơ̆ng êran pral Khánh Hòa- Ƀuôn Ama Thuôt mâo anôk mkŏ plah wah êlan dơ̆ng ala čar 26 leh anăn Êlan dơ̆ng ala čar 1, krĭng Nam Vân Phong, wăl krah Ninh Hòa, čar Khánh Hòa; anôk mkŏ êlan Hồ Chí Minh dar nah Ngŏ ƀuôn prŏng Ƀuôn Ama Thuôt, čar Dak Lak. Boh dlông giăm 118 km, prăk bi liê êbeh 21.900 êklai prăk. Hlăm anăn čar Khánh Hòa ngă pô bi liê 32 km, prăk bi liê 5.632 êklai; Phŭn bruă êlan klông dŭ mdiăng ngă pô bi liê 37,5 km, prăk bi liê 9.818 êklai, bi čar Dak Lak ngă pô bi liê. Hlăm wưng ngă hdră bruă mĭn tĭng mlan 6/2023 truh thŭn 2030 srăng bi leh hrăm mbĭt leh anăn ba yua.

Phạm Ngọc Nghị, Khua Knơ̆ng bruă sang čư̆ êa čar Dak Lak brei thâo, alŭ wăl gĭt gai mtam mơ̆ng leh hdră bruă dưi bi mklă leh anăn mphŭn ruh mgaih anôk ala, leh anăn bi mklă klei kđi čar mơ̆ng alŭ wăl.

“Kơ bruă klam pô, čar Dak Lak ƀuăn rơ̆ng hŏng Khua knŭk kna srăng lŏ dơ̆ng kƀĭn gĭt gai Anôk bruă kriê dlăng hdră bruă, mbĭt hŏng dŭm anôk bruă, alŭ wăl mđĭ pral ruh mgaih anôk ala adôk, ba jao 100% anôk ala leh anăn dŭm klei găl kơ anôk bruă rŭ mkra êlâo 31/12/2023; mjing klei găl hĭn kơ dŭm anôk bruă rŭ mdơ̆ng, kčĕ, hlue ngă hdră bruă djŏ hnơ̆ng.”

Tơdah bi leh, ktuê êlan dơ̆ng pral Khánh Hòa Ƀuôn Ama Thuôt wưng 1 srăng đru bi leh êlan mkŏ krĭng Lăn Dap Kngư hŏng Ktuê hang ksĭ Dhŭng kwar Krah, mkŏ ktuê êlan dơ̆ng êran pral Dưr- Dhŭng nah Ngŏ, êlan Hồ Chí Minh, êlan dơ̆ng ala čar 1, êlan ktuê hang ksĭ, mđĭ lar boh tŭ hdră bruă ngă leh, leh anăn dôk bi liê, ngă djŏ klei čiăng dŭ mdiăng, mjing boh kdrŭt mđĭ kyar. Hdră bruă ăt đru mđĭ klei bi ktưn, mjing klei bi hgŭm leh anăn mđĭ kyar krĭng, đru rơ̆ng klei êđăp ênang, lĭng kahan, lăm lui klei ư̆ êpa bi hrŏ klei ƀun knap, grăp knhuang ngă tŭ dưn hdră kñă, hdră bruă mđĭ kyar bruă duh mkra- ala ƀuôn hlue si Hdră mtrŭn Klei bi kƀĭn tal 13 mơ̆ng Đảng. Hŏng mnuih ƀuôn sang ti dŭm alŭ wăl krĭng taih kbưi mơ̆ng čar Dak Lak leh anăn krĭng nah Dhŭng čar Khánh Hòa, hdră bruă êlan dơ̆ng êran pral Ƀuôn Ama Thuôt - Khánh Hòa jing hdră bruă yuôm bhăn, jing klei mđing dlăng mơ̆ng Đảng, Knŭk kna, hgao klei čang hmăng mơ̆ng mnuih ƀuôn sang.

  Mbĭt hŏng êlan dơ̆ng êran pral Khánh Hòa - Ƀuôn Ama Thuôt, ƀri gưl lŏ mâo 2 hdră bruă phŭn mdê ăt dưi rŭ mdơ̆ng, anăn jing êlan dơ̆ng êran pral Biên Hòa- Vũng Tàu leh anăn Hdră bruă êlan dar mrô 3, ƀuôn prŏng Hồ Chí Minh. Anei jing 3 hdră bruă yuôm bhăn ala čar bruă êlan klông hŏng boh dlông 3 êlan jing 247 km; boh dlông bi liê mơ̆ng 3 hdră bruă êbeh 115 êbâo êklai.

 Blŭ hrăm hlăm knăm mphŭn pŏk, bi ala Khua gĭt gai knŭk kna, Khua knŭk kna Phạm Minh Chính mñă klă, Klei bi kƀĭn Đảng kluôm ala tal 13 lŏ dơ̆ng bi mklă mkŏ mjing hdră bruă nah gŭ hrăm mbĭt jing sa hlăm tlâo hdră bruă êdah êdi, hlăm anăn mđĭ kyar dŭm hdră bruă phŭn ala čar kơ êlan klông. Khua knŭk kna lač, klei yuôm bhăn mơ̆ng 3 hdră bruă:

“Klei mdê êdi mơ̆ng 3 hdră bruă mphŭn hruê anei jing dŭm hdră bruă dưi ba yua klei găl mdê hjăn kơ klei mđĭ mbha gưl mbha klei dưi, hlue anăn jao kơ alŭ wăl ngă pô kriê dlăng hdră bruă; ba yua klei bhiăn iêô mkrum klei găl kơ hdră bruă bi mguôp plah wah prăk knŭk kna gưl dlông leh anăn alŭ wăl; ktrâo phung rŭ mdơ̆ng ciăng ruah phung rŭ mdơ̆ng, mơ̆ng anăn bi kƀiă wưng mprăp čiăng pŏk ngă hdră bruă. 3 klei bhiăn anei mđĭ lar jih hnơ̆ng, bi mklă klei djŏ klă mơ̆ng Đảng, knŭk kna hlăm bruă mtrŭn klei bhiăn mrâo čiăng bi leh hdră kñăm mđĭ kyar bruă nah gŭ êlan klông hlue si Hdră mtrŭn mơ̆ng Đảng.”

 Boh sĭt bi mklă, êlan klông dŭ mdiăng leh anăn êlan leh anăn êlan dơ̆ng êran pral, tač êdeh phiơr, kdrŭn ksĭ ba klei tŭ dưn klă mngač kơ klei mđĭ kyar bruă duh mkra- ala ƀuôn. Ti hnơ̆ng êlan klông đĭ kyar srăng pŏk mlar wăl duh mkra- ala ƀuôn truh tinăn, lu wăl ƀuôn prŏng, tuh tia mkra mjing, hdră bruă hiu čhưn ênguê dưi mkŏ mjing, keh lăn dưi ba yua tŭ dưn./.