VOV4.Êđê- Hrue mbrue (25/5), ti ƀuôn prŏng Ƀuôn Ama Thuôt, Êpul hgŭm mniê čar Daklak mkŏ mjing pŏk Hrue mơak phung mniê rŭ mjing bruă knuă čar Daklak thŭn 2022. Hŏng akŏ jing: Mđĭ klei tŭ dưn boh mnga bruă lŏ hma, hrue mơak phung mniê rŭ mjing bruă knuă čar Daklak mkŏ mjing lu mta bruă: Msĕ si rang mdah mnơ̆ng mơ̆ng phung mnie emkra, ngă klei trông čhai” klei bi mlih mrô, duh mkra mnia mblei hŏng điện tử, klei găl lehanăn klei lông dlăng kơ phung mniê hlăm klei rŭ mjing bruă knuă lehanăn duh mkra mnia mblei; duah bruă knuă mă kơ amai adei mniê, mjuăt bi hriăm hdră duah ƀơ̆ng, mđĭ klei tŭ dưn kphê Việt Nam, lehanăn ngă klei pah mni kơ dŭm êpul  lehanăn amai adei mniê ngă tŭ jing leh klei rŭ mjing bruă knuă wưng thŭn 2017 – 2022.

Anei jing bruă kñăm đru kơ phung amai adei mniê mâo mmông găl bi hriăm êmuh, bi hưn mthâo mnơ̆ng dhơ̆ng pô mkra mjing, bi mguôp hlăm klei duh mkra mnia mblei, duah hdră êlan ruh mgaih djăp mta klei dleh dlan, kñăm hrăm mbĭt ngă bruă./.

Pô mblang: Y-Khem Niê