VOV4.Êđê - Hruê anei 4/8, ti ƀuôn prŏng Hồ Chí Minh, Pŏk kčưm gưl mŭt hlăm klei bi lông knhal tuč klei kdŏ mmuñ mđung asăp kluôm ala tal 15 thŭn 2022. Đồng Mạnh Hùng, Khua êpul mkŏ mjing, khua kiă kriê klei bi lông kdŏ mmuñ, mđung asăp kluôm ala tal 15 brei thâo, anei jing klei kđŏ mmuñ mâo ênoh dŭm alŭ wăl nao hgŭm lu hĭn, mâo jih jang 63 čar, ƀuôn prŏng leh anăn lu anôk bruă mơ̆ng Sang mđung asăp blŭ Việt Nam. Anei ăt jing thŭn mâo lu klei bi lông hĭn, hŏng 500 klei bi lông. Dŭm klei bi lông dưi mŭt hlăm gưl bi lông knhal tuč dưi yap yuôm bhăn êdi, čih hưn kơ boh sĭt klei hdĭp ară anei. Êdah hĭn jing dŭm boh klei djŏ tuôm hŏng bruă ba hdră mtrŭn klei kƀĭn kluôm bruă Đảng tal 13 mŭt hlăm klei hdĭp, bruă qbi mdrơ̆ng hŏng klei ruă tưp Covid-19, dŭm boh klei krŭ wĭt leh anăn mđĭ kyar bruă duh mkra. boh nik mâo lu klei bi lông yal dliê phung mâo klei bi hmô. Anei jing klei tŭ jing mphŭn kčưm hlăm klei kdŏ mmŭñ tal anei. Mta mrâo hlăm klei bi lông thŭn anei jing Êpul mkŏ mjing bi klă mkŏ mjing klei bi lông leh anăn mđup brei klei pah mni Asăp jăk, kñăm bi êdah leh anăn pah mni phung ngă bruă mđung asăp mâo asăp răk, gai hdră kdlưn hĭn, mđup brei klei pah mni kơ 2 mta: Bruă mkŏ mjing kdlưn hĭn leh anăn dưn yua kdrăp mrâo mrang mrô.

Hlăm hdră Klei bi lông bruă mđung asăp kluôm ala tal XV, ti Sang mđung asăp blŭ mnuih ƀuôn sang ƀuôn prŏng Hồ Chí Minh mkŏ mjing leh klei rang mdah “Boh tŭ bruă duh mkra – ala ƀuôn mơ̆ng ƀuôn prŏng Hồ Chí Minh” lehanăn “Boh tŭ đĭ kyar mơ̆ng Sang mđung asăp blŭ mnuih ƀuôn sang ƀuôn prŏng”. Knăm rang mdah “Ƀuôn prŏng Hồ Chí Minh pral kdal – đĭ kyar – jiă klei khăp”, mdah leh 60 pŏk rup mbĭt hŏng lu hdră duh mkra kdlưn hĭn, hưn mthâo kluôm kơ hdră mđĭ kyar bruă duh mkra, kđi čar, dhar kreh, ala ƀuôn mơ̆ng ƀuôn prŏng hlăm dŭm thŭn giăm anei. Klei rang mdah “Boh tŭ đĭ kyar mơ̆ng Sang mđung asăp blŭ mnuih ƀuôn sang ƀuôn prŏng Hồ Chí Minh”, hưn mthâo leh dŭm mta hră m’ar, pŏk rup, mnơ̆ng dhơ̆ng hưn lač kơ hdră mkŏ mkra lehanăn mđĭ kyar Sang mđung asăp blŭ mnuih ƀuôn sang ƀuôn prŏng Hồ Chí Minh êbeh 40 thŭn êgao. Hlăm anăn, mâo dŭm hdră bruă kruăk knăl mơ̆ng Sang mđung asăp blŭ mnuih ƀuôn sang ƀuôn prŏng Hồ Chí Minh msĕ si: Hdră mđung ênhiang mmuñ Mtah, Hdră mđung cải lương Bông lúa vàng; Klei bi lông êdah wăI jơ̆ng Nam Kỳ Khởi Nghĩa… Ti knăm anei, lŏ rang mdah lu mnơ̆ng, kdrăp maĭ mŏk mơ̆ng phung mă bruă klei mrâo mơ̆ng VOH mơ̆ng dŭm ênuk gưl./.

            Y-Ƀel, H’Nêč pô mblang