VOV4.Êđê - Aguah mbruê 21/6, Khua knŭk kna Phạm Minh Chính gĭt gai leh klei kƀĭn trông ba mdah hdră čuăl mkă leh anăn mtrŭt mđĭ duh bi liê krĭng dap mnai krông Cửu Long wưng thŭn 2021 – 2030 ti ƀuôn prŏng Cần Thơ, hŏng klei nao hgŭm mơ̆ng dŭm phŭn, dhar bruă gưl dlông, dŭm alŭ wăl krĭng dap mnai krông Cửu Long, ƀuôn prŏng Hồ Chí Minh, phung duh bi liê, knơ̆ng bruă, ƀĭng hgŭm mđĭ kyar, phung thơ̆ng kơ bruă, phung kreh knhâo.

Klei kƀĭn ba mdah leh hdră êlan ngă bruă mơ̆ng knŭk kna kơ hdră tă mđĭ kyar bruă duh mkra – ala ƀuôn leh anăn rơ̆ng klei êđăp ênang krĭng dap mnai krông Cửu Long, hluê ngă klei bi klă mrô 13 mơ̆ng phŭn bruă kđi čar, ba mdah hdră čuăl mkă krĭng dap mnai krông Cửu Long hluê si klei bhiăn čuăl mkă, mtrŭt mđĭ duh bi liê kơ krĭng dap mnai krông Cửu Long. Hlăm klei kƀĭn, phung bi ala kñăm bi trông kơ dŭm mta phŭn hlăm hdră čuăl mkă krĭng dap mnai krông Cửu Long wưng thŭn 2021 – 2030, hdră tă truh thŭn 2050. Khua knŭk kna Phạm Minh Chính mñă klă, čiăng bi lar ai dưi mơ̆ng lam, boh nik jing anak mnuih, čiăng mâo klei đĭ kyar hmar leh anăn kjăp, djŏ guôp hŏng bruă klam, klei ngă bruă hlăm krĭng, dlăng anei jing bruă klam kñăm, mâo boh tŭ dưn yuôm bhăn hŏng klei đĭ kyar dŭm alŭ wăl hlăm krĭng leh anăn kluôm ala.

Y-Ƀel pô mblang