VOV4.Êđê - Aguah mbruê 4/5, klei kƀĭn trông gưl 5 mơ̆ng êpul khua bruă Đảng gưl dlông tal 13 kčưm pŏk leh ti ƀuôn prŏng phŭn Hà Nội. Khua gĭt gai Đảng Nguyễn Phú Trọng gĭt gai leh anăn mâo klei blŭ yuôm bhăn pŏk klei kƀĭn.

Leh klei hlăk mblang kluôm ênŭm kơ dŭm boh klei čiăng mdưm hlăm 6 mta phŭn ti anôk bi kƀĭn, Khua gĭt gai Đảng Nguyễn Phú Trọng lač klă, mta phŭn ba mdah hlăm klei kƀĭn gưl anei jing dŭm boh klei prŏng, dleh leh anăn yuôm bhăn hŏng bruă ngă tŭ jing hdră mtrŭn klei kƀĭn kluôm bruă Đảng tal 13 hlăm dŭm mta bruă phŭn msĕ si: Mtrŭt mđĭ klei đĭ kyar bruă duh mkra ala ƀuôn hlăm ala čar truh thŭn 2030, tă hdră truh thŭn 2045, mđĭ hĭn bruă mkŏ mjing, ƀuah mkra hlăm Đảng leh anăn bruă kđi čar ƀrư̆ hruê ƀrư̆ ênuah ênô, kjăp mơ̆ng phŭn, mơ̆ng nah gŭ, djăp ênŭm hnơ̆ng čoh čuăn hlăm wưng mrâo.

Khua gĭt gai Đảng Nguyễn Phú Trọng mtă, gưl dlông čiăng bi lar ai tiê bruă klam, kñăm ksiêm duah, bi trông klă, brei klei blŭ čiăng bi kluôm ênŭm leh anăn ksiêm dlăng, bi klă ti knhal tuč klei bi kƀĭn. Boh nik, čiăng ktrâo klă phŭn agha, mă klei hriăm leh anăn ba mdah dŭm hdră êlan mgaih msir hlăm hruê mmông kơ anăp. Mĭn tĭng klei kƀĭn srăng mkŏ mjing ti hruê 10/5.

Y-Ƀel pô mblang