VOV4.Êđê - Aguah anei (14/4), ti sang bruă kƀĭn ala, pŏk leh klei bi kƀĭn tal 10 mơ̆ng Dhar bruă gĭt gai bruă kƀĭn ala gưl 15. Ti anôk bi kƀĭn anei, Dhar bruă gĭt gai bruă kƀĭn ala mă klei blŭ kơ dŭm mta bruă yuôm bhăn pioh ba mdah ti anôk bi kƀĭn tal 3 mơ̆ng Bruă kƀĭn ala. Kơ klei mkŏ mjing hdră bhiăn, dhar bruă gĭt gai bruă kƀĭn ala srăng mă klei blŭ kơ dŭm hdră bhiăn; Msĕ si: Hdră bhiăn êa pui êwa čuh (lŏ mlih mrâo); hdră bhiăn bi kdơ̆ng hŏng klei ngă jhat hlăm găp djuê (lŏ mlih mrâo); hdră bhiăn mlih mrâo, thiăm mbŏ đa đa mta mơ̆ng hdră bhiăn hâo hưn êlan lui kmlă; hdră bhiăn ksiêm dlăng (lŏ mlih mrâo; hdră bhiăn mkă dlăng, mdrao mgŭn (lŏ mlih mrâo); mă klei blŭ kơ dŭm bruă mprăp kơ bruă mkŏ mjing klei bhiăn; klei bhiăn mtrŭn 2023... Kơ dŭm bruă duh mkra ala ƀuôn, dhar bruă gĭt gai bruă kƀĭn ala mă klei blŭ: Ksiêm wĭt klei hâo mdah mơ̆ng knŭk kna kơ klei hlue ngă dŭm hdră mtrŭn mrô 42 thŭn 2017 mơ̆ng Bruă Kƀĭn Ala kơ bruă lông mghaih msir dŭm mta nư amâo lŏ dưi tla hlăm dŭm anôk brei čan prăk; čih mkra hdră mtrŭn mơ̆ng mơ̆ng Bruă kƀĭn ala kơ hdră êlan mđĭ kyar pioh truăn kơ čar Khánh Hoà, hdră lŏ dơ̆ng mbŏ ngăn prăk kơ jih jang bruă lŏ bi kơrŭ bruă duh mkra, hlăm anăn mâo bruă bi kna ngăn prăk kơ klei kơrŭ bruă duh mkra, lehanăn ênoh brei čan prăk ti hnơ̆ng man dưi wưng thŭn 2021 - 2025./.

Y-Khem pô mblang