VOV4.Êđê- Mlam mmăt mbrue (4/8), ti sang mmuiñ prŏng pŏk leh knăm bi lông hdră mđung asăp kluôm ala tal 15 – 2022 hŏng akŏ “Bi mlih hlăm klei mbruă – kpưn đĭ djŏ guôp”. Hŏng êbeh 500 mta hdră mđung asăp nao bi lông, Êpul mkŏ mjing hrŏng ruah leh 203 mta dưi mŭt hlăm klei bi lông gưl knhal tuič, hlăm dŭm hdră čih msĕ si klei yăl dliê, klei êmuh, klei hlăp mgưt, hdră mđung asăp mmông anăn mtam.

Blŭ kiă kriê knăm anei, Nguyễn Trọng Nghiã, Khua kiă kriê bruă hâo hưn gưl dlông lač, klei bi lông anei mâo mkŏ mjing êjai kluôm Đảng, jih jang phung ƀuôn sang, lehanăn lĭng kahan dôk pŏk klei bi ktưn jih ai tiê hlue ngă hdră mtrŭn mơ̆ng klei bi kbiƀn prŏng Đảng 13, sa ai hlue ngă dŭm hdră êlan mơ̆ng Đảng, knŭk kna kñăm kơrŭ wĭt lehanăn mđĭ kyar bruă duh mkra ala ƀuôn êdei kơ klei ruă tưp Covid 19. NguyễnTrọng Nghiã mtă kơ sang mđung asăp blŭ Việt Nam, lehanăn dhar bruă mđnung asăp hlăm kluôm ala lŏ jing pô blŭ mgang kơ yang ƀuôn hŏng mta kñăm mkŏ mjing hdră êlan djŏ, mâo ai hdĭp hlăm bruă knuă, đru krơ̆ng kjăp kle ihơĭt hlăm bruă kđi čar, lehanăn mđĭ kyar lăn čar, pŏk mlar klei êngiê, mđĭ klei Đảng, lehanăn knŭk kna kiă kriê./.

Pô mblang: Y-Khem Niê