VOV4.Êđê - Aguah mbruê 28/6, Êpul khua bruă Đảng ƀuôn prŏng Hà Nội mkŏ mjing leh klei kbĭn trông tal 8 kñăm bi klă, brei klei blŭ kơ dŭm mta phŭn, hlăm anăn mâo hdră mđĭ kyar sang dôk ti ƀuôn prŏng Hà Nội, wưng thŭn 2021 – 2030, ksiêm dlăng hdră ngă bruă mơ̆ng bruă Đảng ƀuôn prŏng hluê ngă hdră mtrŭn mrô 15 mơ̆ng phŭn bruă kđi čar kơ hdră tă, bruă klam mđĭ kyar ƀuôn prŏng phŭn Hà Nội truh ti thŭn 2030, hdră tă truh thŭn 2045. Blŭ pŏk klei kƀĭn, kơ hdră mđĭ kyar sang dôk ti ƀuôn prŏng Hà Nội, wưng thŭn 2021 – 2030, khua bruă Đảng ƀuôn prŏng Đinh Tiến Dũng brei thâo hdră mkăp anei mâo leh Êpul khua bruă Đảng bruă sang čư êa ƀuôn prŏng mkŏ mjing kluôm ênŭm, djŏ hŏng hdră bhiăn. Klei hưn mdah mơ̆ng Êpul khua bruă Đảng bruă sang čư êa ƀuôn prŏng brei ƀuh 6 mlan akŏ thŭn, ƀuôn prŏng dưi ksiêm dlăng jăk klei ruă tưp Covid-19, dŭm mta bruă mkra mjing, mnia mblei, hiu čhưn ênguê, sang huă mnăm, sang jưh dưi wĭt pŏk ƀăng hlăm wưng aguah tlam mrâo dưi mkŏ mjing leh ai dưi krŭ wĭt, mđĭ kyar bruă duh mkra. Hnư knŭk kna hrui wĭt hlăm alŭ wăl đĭ êbeh 20% mkă hŏng wưng anei thŭn dih leh anăn mâo giăm 57% hdră kčah hlăm thŭn. Klei đĭ kluôm mnơ̆ng dhơ̆ng ti alŭ wăl hlăm 6 mlan đĭ 7,79% đĭ 1,29 blư̆ mkă hŏng wưng anei thŭn dih.

Y-Ƀel pô mblang