VOV4.Êđê - Mđing truh knăm bi hdơr 61 thŭn klei truh đioxin Việt Nam (10/8/1961 – 10/8/2022), 75 thŭn Hruê kahan êka êkeh – djiê êngiă 27/7 lehanăn mđing Hruê kyua mnuih djŏ drao ruă dioxin Việt Nam 10/8, aguah 20/7, ti Sang kriê pioh kdrăp mnơ̆ng čar Kon Tum mkŏ mjing leh Knăm rang mdah “Dioxin – Klei khăp lehanăn klei djŏ hdră bhiăn” Kon Tum 2022.

Mkŏ mjing mơ̆ng hruê 20/7 truh jih hruê 25/8, knăm anei hưn mthâo giăm 400 pŏk rup, hră m’ar lu mta phŭn, msĕ si: Klei truh jŭ jhat mơ̆ng dioxin, Việt Nam msir mghaih klei truh jhat mơ̆ng klei bi blah yua êa drao ruă; Hdră mă bruă mơ̆ng Êpul hgŭm phung djŏ Dioxin Việt Nam lehanăn ktuê êlan lŏ sua wĭt klei dưi djŏ hdră bhiăn kơ mnuih djŏ drao ruă dioxin…

Hluê dŭm pŏk rup, hră m’ar ti knăm anei, mnuih ƀuôn sang, phung tuê hiu čhưn lehanăn ƀĭng găp ala tač êngao srăng thâo hĭn klei truh jhat mơ̆ng dioxin hŏng wăl hdĭp mda, klei suaih pral. Kơ dŭm klei gĭr mơ̆ng Đảng, knŭk kna, lĭng kahan, Êpul hgŭm phung djŏ Dioxin Việt Nam, mơ̆ng čar Kon Tum… hlăm bruă msir mghaih klei truh mơ̆ng drao ruă dioxin hlăm klei blah ngă lehanăn hdră dlăng kriê, đru kơ phung mâo klei truh, bi hgŭm mguôp, bi kdơ̆ng hŏng klei ba yua lar ƀar phao ktuang bi mdjiê lu mnuih, sa ai hŏng bruă sua wĭt klei dưi djŏ hdră bhiăn kơ mnuih djŏ drao ruă dioxin…/.

H’Nêč pô mblang